Bolqarıstan milli komandasının yeni baş məşqçisi İvaylo Petev İtaliya yığması ilə AVRO-2016-nın seçmə qrup matçı öncəsi mətbuat konfransı keçirib. Sportnet.az-ın məlumatına görə, 40 yaşlı mütəxəssis rəqibin təqdimata və reklama ehtiyacının olmadığını bildirib.
O deyib ki, əsas məsələ öz komandasının necə çıxış etməsi və bunu ən yüksək səviyyədə bacarmasıdır: "Debüt matçı üçün Azərbaycan, Norveç və ya İtaliyanı seçməyə qalsaydı, mən sonuncusuna üstünlük verərdim. Vacib məsələ bizim necə müqavimət göstərəcəyimizlə bağlıdır. Bütün sahələrdə nizam-intizamlı olmaq lazımdır. Həmçinin, futbolçularımı yaxşı əhval-ruhiyyədə kökləmək istəyirəm".
Qeyd edək ki, Bolqarıstan millisi AVRO-2016-nın seçmə qrup mərhələsində ilk görüşünü Bakıda Azərbaycan yığmasına qarşı keçirib və qalib gəlib - 2:1. İtaliya ilə oyun martın 28-də Sofiyada baş tutacaq. İvaylo Petev ötən ilin yayında "Qəbələ"nin baş məşqçi postuna namizəd olsa da, son anda təyinat alınmayıb.
