Azərbaycan millisinin baş məşqçisi Robert Prosineçki U-21 yığmamızın "Antalya Cup” turniri çərçivəsində Ukraynanın müvafiq yaş qrupuna aid komandası ilə oyununa baxıb. Sportnet.az-ın məlumatına görə, xorvatiyalı mütəxəssis qarşılaşmadan sonra affa.az-a fikirlərini bölüşüb.
O, komandamızın oyunundan razılıq ifadə edib: "Maraqlı oyun izlədik. Komandanın çıxışından razı qaldım. Futbolçularımız yaxşı mübarizə apardılar. Sevindirici məqamlardan biri də Namik Ələskərovun uzun fasilədən sonra yaşıl meydanlara dönüşü və 2 qol vurmasıdır. Unutmayaq ki, rəqibimiz də güclü komandadır. Onları yaxşı tanıyıram”.
Qeyd edək ki, görüş millimizin qələbəsi ilə yekunlaşıb - 2:1.
