"Bakı" klubunun sabiq baş məşqçisi Milinko Pantiç andorralı məşqçilərə dərs keçəcək. Sportnet.az-ın Andorra Futbol Federasiyasının rəsmi saytına istinadən məlumatına görə, dərslərə "Elçe" və "Xetafe"nin eks-baş məşqçisi Fran Eskriba da dəvət alıb.
Treninq bütün andorralı məşqçilər və könüllü kimi iştirak etmək istəyənlər üçün nəzərdə tutulub. Andorranın Bələdiyyə Stadionunda təşkil olunacaq treninq zamanı Pantiç "Komandanın peşəkarlığına cavabdehlik üçün məşqçi hansı addımları atmalıdır" mövzusunda mühazirə oxuyacaq. Dərslər mayın 31-də və iyunun 1-də olacaq.
Milinko Pantiç 2013-2014 mövsümündə "Bakı"nın baş məşqçisi olub.
Qeyd edək ki, Andorra yığması mayın 26-da Avstriyada təlim-məşq toplanışı çərçivəsində Azərbaycanla yoldaşlıq görüşü keçirəcək.
