"Gəncədə futbolun nə qədər sevildiyi məlumdur. Bunun nəticəsidir ki, "Kəpəz"in böyük fanat ordusu var". Sportnet.az-ın məlumatına görə, bunu "Kəpəz"in icraçı direktoru Cabir İbrahimov klub saytına açıqlamasında deyib.
Komandanın azarkeşlərindən danışan C.İbrahimov azarkeşlər daim ev oyunlarına maraq göstərdiklərini bildirib: "Bu işdə klub rəhbərliyi də maraqlıdır. Çünki futbol azarkeşlər üçündür. Çempionat yeni başlayanda ilk iki ev oyunumuza bilet satışı təşkil etmədik. Necə ki, azarkeşlər "Kəpəz"in arxasındadırlar, eləcə də biz onların yanındayıq. "Qarabağ"la ev oyununda isə stadiona giriş pullu olsa da, bu tamaşaçı axınına mane olmadı. Əksinə, rəqəmlər də göstərir ki, matça daha çox tamaşaçı gəldi. Komandamız da güclü dəstəyin nəticəsində daha da yaxşı oynayır və uğurlu nəticələr göstərməyə çalışır. Fürsətdən istifadə edib azarkeşləri qarşıdakı ev oyunlarımıza dəvət edirəm, stadiona gəlib doğma komandaya ruh versinlər".
