"Biz həvəsdən düşə bilmərik. Oyuna pozitiv əhval-ruhiyyədə köklənməli, qələbə qazanmalıyıq. 2 oyundan 1 xal bizə kifayət deyil".
Sportnet.az-ın məlumatına görə, bunu Çexiya milli komandasının futbolçusu Filip Novak Azərbaycan yığması ilə 2018-ci il dünya çempionatının seçmə qrup matçından öncə yerli jurnalistlərə açıqlamasında deyib.
Müdafiəçi azarkeşlərə də səslənməyi unutmayıb: "Fikrimcə, azarkeşlərimiz də kömək edəcəklər və stadionda əla ab-hava yaranacaq".
Qeyd edək ki, bu gün Ostrava şəhərindəki "Vitkovitse" stadionunda keçiriləcək Çexiya - Azərbaycan matçı Bakı vaxtı ilə saat 22:45-də başlanacaq.
