Azərbaycanın yeni FİFA referisi Ömər Paşayev İspaniyaya yollanacaq. Bu haqda Sportnet.az saytına gənc beynəlxalq dərəcəli baş hakimin özü məlumat verib.
O, 2017-ci il yanvarın 30-dan Malaqa şəhərində TOP və 1-ci qrupa daxil olan FIFA referiləri üçün UEFA-nın təşkilatçılığı ilə keçiriləcək, sayca 25-ci kursda qatılacağını bildirib. Paşayevin təcrübəli həmkarı, 2013-cü ildən FİFA referisi olan Əliyar Ağayev də həmin seminarda iştirak edəcək: "Malaqaya Əliyarla birgə yollanacağam. Ancaq Ağayevdən fərqli olaraq, mən yeni FİFA referisi kimi dəvət olunmuşam. Kurs 3 gün davam edəcək. Yanvarın 29-da səfərə çıxaraq fevralın 2-də qayıdacağıq. 40-a yaxın yeni FİFA referisi Malaqada olacaq. Onlar ilk dəfə beynəlxalq dərəcə alan hakimlər üçün nəzərdə tutulan testləri verməlidir. İlk gün fitnes testləri olacaq. Sonrakı günlərdə TOP və 1-ci qrupa daxil olan tanınmış FİFA referilərinin qatıldığı seminarda iştirak edəcəyik. Yeni FİFA referilərinə ingilis dili üzrə danışıqdan da imtahan olacaq. Kursun nəticələri sonradan müvafiq federasiyaların, o cümlədən AFFA-nın Hakimlər Komitəsinə göndəriləcək".
Paşayev testləri uğurla verəcəyinə inanır: "Çempionatda yaranan qış fasiləsində biz hakimlər də Antalyada təlim-məşq toplanışında olacağıq. Orada yaxşı hazırlıq keçərək İspaniyaya yollanacağıq. Fiziki formam, ingilis dili səviyyəm yaxşı olduğundan kursda müsbət nəticələr verməyimdə problem görmürəm".
Ağayevin isə növbəti ildən FİFA 1-ci qrupa daxil olan hakimlərin sırasında yer alması gündəmdədir və bununla əlaqədar o, kursa dəvət olunub. Orada Martin Atkinson, Mark Klattenburq, Kleman Turpen, Deniz Aytekin, Feliks Brıx, Viktor Kaşşai, Nikola Ritsoli, Canluka Rokki, Paolo Talyiavento, Damir Skomina, Alberto Undiano Malyenko, Yonas Eriksson, Cüneyt Çakır və digər tanınmış hakimlər iştirak edəcək.
Mehman SÜLEYMANOV
