"Zirə"dəki baş məşqçi dəyişikliyi Azərbaycan Premyer Liqasında yaş ardıcıllığını dəyişdirib.
Sportnet.az-ın məlumatına görə, hazırda ən gənc baş məşqçi Adil Şükürovu əvəzləyən Ayxan Abbasov olub. Gənc mütəxəssisin 36 yaşı bu il avqustun 25-də tamamlanacaq.
Əslində 40 yaşlı Şükürov də gənc baş məşqçi olsa da, ən gənci deyildi. Bu, "Sumqayıt"ın "sükanı arxası"nda olan Samir Abasova məxsus idi. Şükürov isə ondan 1 yaş böyük olaraq sıralamada 7-ci idi. Artıq "Zirə" ilə "Sumqayıt" sıralamada yerlərini dəyişdilər. Ən yaşlı baş məşqçi "İnter"ə başçılıq edən Zaur Svanadzedir ki, Abbasov onun oğlu yerinə düşür. Beş gün öncə 59 yaşı tamam olan gürcü mütəxəssis 60 illik yubileyinə hazırlaşır.
Qeyd edək ki, Ayxan Abbasovun məşqçilik karyerası "Zirə" ilə bağlıdır. O, gümüş medal qazandıqları debüt mövsümündə baş məşqçi Şükürovun köməkçisi idi. Ötən yay əvəzedici heyətə baş məşqçi göndərilən Abbasovun rəhbərliyi altında komanda qış fasiləsinə 20 xalla 4-cü pillədə çıxdı.
Azərbaycan Premyer Liqa klublarının baş məşqçilərinin təvəllüdləri
1. Zaur Svanadze ("İnter") - 23.01.1958
2. Roman Qriqorçuk ("Qəbələ") - 22.03.1965
3. Şahin Diniyev ("Kəpəz") - 12.07.1966
4. Elxan Abdullayev ("Neftçi") - 19.05.1970
5. Tərlan Əhmədov (AZAL) - 17.11.1971
6. Qurban Qurbanov ("Qarabağ") - 13.04.1972
7. Samir Abasov ("Sumqayıt") - 01.02.1978
8. Ayxan Abbasov ("Zirə") - 25.08.1981
