Bu gün futbol üzrə Azərbaycan Premyer Liqasının XV turuna yekun vurulacaq. Sportnet.az-ın məlumatına görə, qarşılaşmaların hər ikisi Bakıda keçiriləcək.
"Zirə" öz meydanında AZAL-ı sınağa çəkəcək. Aktivində 8 xal olan AZAL sonuncu pillədən xilas olmaq üçün qələbə qazanmalıdır. Meydan sahibləri isə qələbə sayəsində xal ehtiyatını 18-ə çatdıracaq və "Sumqayıt"la 4 və 5-ci pillələri bölüşəcək. Komandalar ölkə çempionatlarında bu günə qədər 6 oyun keçirib. Görüşlərdən 3-ü "Zirə"nin, 1-i isə AZAL-ın xeyrinə başa çatıb. 2 oyunda isə qalib müəyyənləşməyib. Son 4 qarşılaşmada hər iki komanda qol vurub. "Zirə” öz meydanında xal itirməyib. AZAL isə son 4 matçda qalib gəlməyib.
Turun və günün son oyunu isə "Azərsun Arena"da keçiriləcək. "Qarabağ" cari mövsümdə uğursuzluq zolağına düşən "Neftçi"ni qəbul edəcək. Hazırda "Qəbələ" ilə eyni - 32 xala malik "Qarabağ" qələbə sayəsində yenidən liderliyə yüksələcək. "Neftçi" isə səfər qələbəsi ilə xalını 12-yə çatdıracaq ki, bu da Bakı təmsilçisini "Kəpəz"ə bir az yaxınlaşdıracaq. Komandalar ölkə çempionatları tarixində bu günə qədər 66 oyun keçirib. 24 oyunda "Qarabağ" qazanıbsa, "Neftçi" 18 dəfə meydanı 3 xalla tərk edib. 24 oyun isə bərabərliklə başa çatıb. "Qarabağ” son 4 görüşdə xal itirməyib. "Neftçi” son iki səfərdə qola da həsrət qalıb. Bakılılar son 7 səfər matçında qələbə qazana bilməyib.
Azərbaycan Premyer Liqası, XV tur
29 yanvar
15:00. "Zirə" - AZAL - 2:1
Qol: Sezar Meza Kolli, 11; 29 - Rəşad Abdullayev, 50
Hakimlər: Rəvan Həmzəzadə, Yaşar Abbasov, Mübariz Haşımov, Vüsal Qənbərov
Əlavə köməkçi hakimlər: Orxan Məmmədov, Elvin Əsgərov
AFFA nümayəndəsi: Rauf Hüseynli
Hakim-inspektor: Murad Məmmədov
Zirə İdman Kompleksinin stadionu
17:30. "Qarabağ" – "Neftçi" - 1:1
Qol: Dino Ndlovu, 73 (P) - Cavid İmamverdiyev, 12
Hakimlər: Ramil Diniyev, Vaqif Musayev, Mehman Mahmudov, Coşqun Həsənov
Əlavə köməkçi hakimlər: Rauf Cabbarov, İnqilab Məmmədov
AFFA nümayəndəsi: Əsgər Əmirəliyev
Hakim-inspektor: Xaqani Məmmədov
"Azersun Arena"
Qeyd edək ki, turun açılış oyununda "Qəbələ" və "Sumqayıt" arasında 1:1 hesabı qeydə alınıb. "İnter" isə "Kəpəz"i 4:1 hesabı ilə məğlub olub.
