Tanınmış bolqarıstanlı futbolçu Valeri Bojinovun karyerasını Azərbaycanda davam etdirmək variantı gündəmdən düşmür. Sportnet.az-ın məlumatına görə, Serbiyanın "Partizan" klubunun təcrübəli hücumçusu ölkəmizdə çıxış etməsinin mümkünlüyündən söz açıb.
Bojinovun sözlərinə görə, Premyer Liqamızın iştirakçısı olması məsələsinin üstündən xətt çəkilməyib: "Hələ çox ölkə var ki, onlarda "transfer pəncərəsi" hələ bağlanmayıb. Mənə maraq var və Rusiya, İsveçrə, Azərbaycan, Çin komandaları ilə danışıqlar aparılır. Hazırda "Partizan"ın futbolçusyam. Bu klubda oynamaq mənim üçün məmnunluq yaradır. Burada özümü çox yaxşı hiss edirəm. Hamı ilə yaxşı dil tapıram. Komanda yoldaşlarım, məşqçilər, azarkeşlər, klubun sahibləri mənə hörmət edir. Rəhbərlik pul qazanmaq üçün məni satmaq istəyir. Onlar mənimlə bağlı təklifləri nəzərdən keçirirlər. Hələ vaxt var".
Xatırladaq ki, Bojinovun qış fasiləsində "Qəbələ"yə keçmək varinatı gündəmdə olub. Premyer Liqamızda "transfer pəncərəsi" bağlandığından futbolçu yalnız azad agent statusu olacağı halda hansısa klubumuza keçə bilər.
