Azərbaycan I Divizionunun V turunda "Şüvəlan" və MOİK komandaları arasında keçirilmiş oyun zamanı kütləvi dava baş verib.
Sportnet.az xəbər verir ki, insident "AZAL Arena"dakı görüşün uzatma dəqiqələrinə təsadüf edib. Meydan sahiblərinin yarımmüdafiəçisi Elçin Əliyev əks-hücuma çıxmaq istəyən rəqibin orta sahə oyunçusu Ceyhun Muxtarlının ayağına bilərəkdən zərbə endirib. Nəticədə Muxtarlı yerə sərilib. MOİK-in digər futbolçuları isə Əliyevin üzərinə cumub. "Şüvəlan"ın futbolçuları qaydanı pozan komanda yoldaşlarını qorumağa başlayıblar. Bu zaman münaqişəyə ehtiyat oyunçular skamtasındakılar da qoşulub. Nəticədə toqquşmanın miqyası böyüyüb.
Baş hakim Ziya Nəsirov Əliyevə və bu futbolçunu təhqir edən MOİK-in oyunçusu Orxan Həsənova qırmızı vərəqə göstərib. Hakimin qərarına etiraz edən "hərbçilər"in kapitanı Mübarək Şaquliyev isə sarı vərəqə alıb.
Qeyd edək ki, MOİK-in 1:0 hesablı qələbəsi ilə yekunlaşan görüş sərt mübarizəyə səhnə olub. Meydan sahiblərindən 4, qonaqlardan 5 futbolçu sarı vərəqə alıb. Yeganə qolu 24-cü dəqiqədə Raul Yaqubzadə vurub. Bu qələbə sayəsində xallarını 15-ə çatdıran "hərbçilər" "Sumqayıt-2" ilə birgə ilk 2 yeri bölüşür. "Şüvəlan" isə 7 xalla 7-cidir.
