Topaz Premyer Liqasında XII tura yekun vurulub.
Sportnet.az-ın məlumatına görə, turun son oyununda "Zirə" və "Sumqayıt" komandaları üz-üzə gəlib. "Dalğa Arena"da keçirilmiş qarşılaşma meydan sahiblərinin qələbəsi ilə yekunlaşıb - 3:1. "Zirə"nin heyətində moldovalı legioner Aleksandr Dedov "dubl" edib. O, 36-cı və 75-ci dəqiqələrdə fərqlənib. 90+7-ci dəqiqədə isə Bilal Həmdi 3-cü qolun müəllifi olub. "Sumqayıt"dan yeganə qola 45+3-cü dəqiqədə Əfran İsmayılov imza atıb.
Bu qələbə sayəsində "Zirə" xallarını 9-a çatdıraraq, "Keşlə" ilə bərabərləşsə də, sonuncu pillədən qurtula bilməyib. Bu, şəxsi oyunlarda paytaxt təmsilçisinin daha üstün olmasıdır. "Sumqayıt" isə 11 xalla 6-cı pillədə qalıb.
Qeyd edək ki, turun ilk 3 oyununda "Qəbələ" səfərdə "Keşlə"ni 2:1, "Neftçi" isə "Səbail"i 2:0 hesabı ilə məğlub edib. "Qarabağ" - "Sabah" matçı isə heç-heçə ilə yekunlaşıb - 1:1.
------------------------
Topaz Premyer Liqasında XII turun daha bir görüşü keçirilib.
Sportnet.az xəbər verir ki, ikinci oyun günündə "Səbail" "Bayıl Arena"da lider "Neftçi"ni qəbul edib. Matç qonaqların 2:0 hesablı qələbəsi ilə yekunlaşıb. Oyunun əvvəlindən üstünlüyü ələ alan flaqman ilk qolu 41-ci dəqiqədə vurub. Emin Mahmudovun asmasından sonra Baqali Dabo yaxın məsafədən topu başla tora göndərib. Fasilədən sonra "ağ-qaralar" daha bir qol vurub. 52-ci dəqiqədə top Maudo Jarjuenin əlinə dəyib. Baş hakim Rauf Cabbarov penalti təyin edib. Emin Mahmudovun zərbəsi dəqiq olub. 90+1-ci dəqiqədə isə "Səbail"in legioneri Tome Kitanovski ikinci sarı vərəqəni alaraq meydandan qovulub.
Bu qələbə sayəsində xallarını 26-ya çatdıran "Neftçi" ən yaxın izləyicisi "Qarabağ"ı 5 xal geridə qoyub. "Səbail" isə 20 xalla 3-cü pillədə qalıb.
Tura saat 19:00-da başlanacaq "Zirə" - "Sumqayıt" matçı ilə yekun vurulacaq.
Qeyd edək ki, ilk oyun günündə "Qəbələ" səfərdə "Keşlə"ni yenib - 2:1. "Qarabağ" isə evdə "Sabah"la 1:1 hesablı heç-heçə edib.
------
Bu gün Topaz Premyer Liqasında XII turun son görüşləri keçiriləcək.
Sportnet.az xəbər verir ki, ikinci oyun gününün qarşılaşmaları da paytaxtda təşkil olunacaq. Əvvəlcə "Bayıl Arena"da "Səbail" və "Neftçi" komandaları üz-üzə gələcək. Hazırda "ağ-qaralar" 26 xalla lider, "ağ-mavilər" isə 20 xalla 3-cü pillədədir. İlk oyun günündə əsas rəqibləri "Qarabağ" və "Sabah" arasındakı görüşdə qeydə alınan 1:1 hesablı heç-heçədən sonra bugünkü rəqiblərin mövqelərini daha da yaxşılaşdırmaq imkanı yaranıb. "Səbail" qələbə qazansa, Ağdam komandası ilə xal fərqini minimuma endirəcək. Oyundan "Neftçi" qalib ayrılsa, çempionluq yolunda əsas rəqibi ilə fərqi 5-ə yüksəldəcək.
Bu komandalar indiyədək 5 dəfə üz-üzə gəliblər. Cəmi 1 dəfə "Səbail", 4 dəfə "Neftçi" qalib gəlib, heç-heçə isə hələ qeydə alınmayıb. Topların nisbətində qocaman klub xeyli öndədir - 13:2. Bu, həm ilk dövrədə, həm də ötən mövsümkü oyunlardan birində "ağ-qaralar"ın 4:0 hesablı qələbə qazanması nəticəsində baş verib. Digər tərəfdən, son 4 oyunda "Neftçi", "Səbail"in ev matçlarında isə qol vuran komanda qalib gəlib.
Turun son qarşılaşması isə "Dalğa Arena"da "Zirə" və "Sumqayıt" arasında keçiriləcək. Bu görüşdə meydan sahiblərinin baş məşqçisi Samir Abasov və onun qonaq komandadakı həmkarı Ayxan Abbasov uzun müddət rəhbərlik etdikləri kollektivlərə qarşı mübarizə aparacaqlar. Abasov avqustun 29-dan, Abbasov isə noyabrın 14-dən hazırkı vəzifələrindədir. Ötən mövsümlə müqayisədə indi hər iki komanda çətin günlərini yaşayır. "Sumqayıt" 11 xalla 6-cı, "Zirə" 6 xalla 8-ci pillədə qərarlaşıb.
Bu, Abbasovun yeni komandasında ilk rəsmi oyunu olacaq. İki kollektiv isə 14-cü dəfə üz-üzə gələcək. Əvvəlki görüşlərin 6-da "Zirə", 4-də "Sumqayıt" qələbə qazanıbsa, 3 görüşdə qalib müəyyənləşməyib. Topların nisbətində də qəsəbə təmsilçisi öndədir - 15:11. "Sumqayıt” 6 oyundur meydanı qolsuz tərk etmir. "Zirə” son 4 matçda yalnız 1 qələbə qazanıb.
Topaz Premyer Liqası, XII tur
25 noyabr (bazar)
17:00. "Səbail” – "Neftçi” - 0:2
Qollar: Baqali Dabo, 41. Emin Mahmudov, 52 (pen.)
Qırmızı vərəqə: Tome Kitanovski, 90+1 ("Səbail")
Hakimlər: Rauf Cabbarov, Cəmil Quliyev, Vüqar Bayramov, Sərxan İsmayılov
Hakim-inspektor: Rövşən Əhmədov
AFFA nümayəndəsi: Namiq Məstanov
"Bayıl Arena"
19:00. "Zirə” – "Sumqayıt” - 3:1
Qol: Aleksandr Dedov, 36; 75. Bilal Həmdi, 90+7 - Əfran İsmayılov, 45+3
Hakimlər: Səbuhi Bayramov, Mübariz Haşımov, Nahid Əliyev, Rəhim Həsənov
Hakim-inspektor: Şahin Cəfərov
AFFA nümayəndəsi: Erkin Hüseynov
"Dalğa Arena”
Qeyd edək ki, ilk oyun günündə "Qəbələ" səfərdə "Keşlə"ni məğlubiyyətə 2:1 hesabı ilə yenibsə, "Qarabağ" - "Sabah" matçında qalib müəyyənləşməyib - 1:1.
