Milli komandaların oyunları ilə əlaqədar yaranacaq fasilə ərəfəsində “Qəbələ” “Səbail”lə Azərbaycan Premyer Liqası tarixində 12-ci dəfə qarşılaşacaq.
Sportnet.az xəbər verir ki, əvvəlki 11 görüşdə üstünlük əyalət təmsilçisinin tərəfində olub. Hesabında 6 qələbə və 3 heç-heçə olan “Qəbələ” yalnız iki dəfə uduzub. Rəqib qapısından 20 top keçirən futbolçular 11 qol buraxıblar. Komandanın qollarından 6-na Baqali Dabo imza atıbsa, Famussa kone və Ceyms Adeniyi hərəyə 3 dəfə fərqlənib.
Bu matçlardan 2-si Azərbaycan Kuboku, 9-u Premyer Liqa çərçivəsində baş tutub. Çempionatdakı oyunlardan 4-də qələbə qazanan “Qəbələ” 3 heç-heçə edib və 2 dəfə xalsız qalıb. Top fərqi də “qırmızı-qaralar”ın xeyrinədir – 15:9.
Ev oyunlarında “Səbail”ə uduzmayan “qırmızı-qaralar” 4 dəfə qalib gəlib, 1 dəfə heç-heçə edib. 10 qola imza atan əyalət komandasının futbolçuları 3 top buraxıblar. Komanda ev matçlarından qolsuz ayrılmayıb.
