Azərbaycan millisi AVRO-2020-nin seçmə mərhələsində son oyununu keçirib.
Sportnet.az xəbər verir ki, Nikola Yurçeviçin baş məşqçi olduğu komanda Slovakiyanın qonağı olub. Trnava şəhərindəki Anton Malatinski stadionunda təşkil olunan qarşılaşma Azərbaycan yığmasının 0:2 hesablı məğlubiyyəti ilə yekunlaşıb.
Görüş meydan sahiblərinin üstünlüyü ilə başlayıb. Azərbaycan millisi rəqibin təzyiqinə 19 dəqiqə tab gətirə bilib. Slovakiyanın heyətində Robert Bojenik fərqlənib. İlk hissənin qalan dəqiqələrində də meydan sahibləri topa daha çox sahib olub. Rəqibin bir sıra cəhdləri uğursuz alınıb. İlk yarı bu hesabla yekunlaşıb.
64-cü dəqiqədə Şəhriyar Rəhimovun ötürməsi çərçivəyə yönəlib. Rəqiq qapıçı çətinliklə topun qapıdan keçməsinə mane olub. 81-ci dəqiqədə Renat Dadaşov hesabı bərabərləşdirməyə yaxın olub. Hücumçu qapıçı ilə təkbətək dueldən yararlana bilməyib. 86-cı dəqiqədə isə Marek Hamşikin zərbəsindən sonra top Bəhlul Mustafazadəyə dəyərək qapıya daxil olub.
Bu nəticədən sonra Slovakiya 13-cü xalını qazanıb, Azərbaycan millisi seçmə mərhələni 1 xalla başa vurub.
Slovakiya ilə görüşdə Vüsal İsgəndərli və Elvin Camalov yığmanın heyətində debüt ediblər.
E qrupunun digər oyununda Uels Macarıstanı 2:0 hesabı ilə məğlub edərək həlledici raunda yüksəlib. Slovakiya isə seçmə mərhələ vasitəsilə Avropa çempionatına vəsiqə şansını itirib.
-----------
Azərbaycan millisi bu gün AVRO-2020-nin seçmə mərhələsində sonuncu oyununa çıxacaq.
Sportnet.az xəbər verir ki, Nikola Yurçeviçin rəhbərlik etdiyi kollektiv Slovakiya yığmasının qonağı olacaq. Trnavadakı Anton Malatinski adına stadionda baş tutacaq matç Bakı vaxtı ilə saat 23:45-də start götürəcək.
Cari tskilda bu komandalar arasında iyunun 11-də “Bakcell Arena”da keçirilmiş qarşılaşmada qonaqlar 5:1 hesabı ilə qalib gəliblər. Görüşdə hesabı 8-ci dəqiqədə Stanislav Lobotka açıb. 27-ci dəqiqədə Yuray Kuçka cərimə zərbəsindən baxımlı qola imza atıb. Bundan 2 dəqiqə sonra Ramil Şeydayev fərqlənməklə Azərbaycan millisini ümidləndirib. Lakin 1 dəqiqə sonra Slovakiya yığmasının kapitanı Marek Hamşik fərqi yenidən artırıb. O, 57-ci dəqiqədə özünün 2-ci, komandasının 4-cü qolunu vurub. Son nöqtəni isə 85-ci dəqiqədə David Hançko qoyub.
Slovakiya ilə Azərbaycan milliləri dünya və Avropa çempionatlarının seçmə mərhələlərində 8-ci dəfə üz-üzə gələcəklər. İndiyə qədər baş tutmuş 7 matçdan 6-da rəqib qalib gəlib. 6 iyun 2001-ci ildə Bakıda DÇ-2002-nin seçmə mərhələsi çərçivəsində keçirilən oyunda isə Azərbaycan millisi hələlik yeganə olan qələbəsini qazanıb – 2:0. Tofiq Bəhramov adına Respublika stadionunda Vadim Vasilyevlə Zaur Tağızadə fərqləniblər.
E qrupunda 1 xalla sonuncu pillədə qərarlaşan Azərbaycan millisi Avropa çempionatına vəsiqə şansını itirsə də, rəqibin belə bir imkanı var. Lakin Pavel Hapalın baş məşqçi olduğu komadanın taleyi öz əlində deyil. Hazırda 10 xalla 4-cü pillədə qərarlaşan Slovakiya son oyunda qalib gəlməklə yanaşı, paralel keçiriləcək Uels - Macarıstan matçında heç-heçə qeydə alınmalıdır. 12 xalla 2-ci sırada yer alan Macarıstan şəxsi oyunlara görə slovakiyalılardan geri qalır (2:0, 2:1). Uels isə 11 xalla 4-cü yerdədir.
Azərbaycan millisinin heyətində iki itki var. Hücumçu Rüfət Dadaşovla müdafiəçi Maksim Medvedev zədə üzündən hələ Uelslə oyundan əvvəl heyətdən çıxarılıblar. Əvəzində britaniyalıların 2:0 hesabı ilə qalib gəldikləri matçı buraxan Eddi İsrafilov komandaya qoşulub.
AVRO-2020
Seçmə mərhələ, E qrupu
19 noyabr
23:45. Slovakiya - Azərbaycan - 2:0
Qollar: Robert Bojenik, 19. Marek Hamşik, 86
Baş hakim: Sergey Boyko
Yan xətt hakimləri: Vladimir Volodin və Semyon Şlonçak
Dördüncü hakim: Vitali Romanov (hamısı Ukrayna)
Hakim-inspektor: Kevin Azzopardi (Malta)
UEFA nümayəndəsi: Skot Struters (Şotlandiya)
Trnava, Anton Malatinski adına stadion