Futbol üzrə Azərbaycan Premyer Liqasında XII turun son oyunu keçirilib.
Sportnet.az-ın məlumatına görə, "Bank Respublika Arena"da "Sabah" və "Neftçi" komandaları üz-üzə gəlib.
FIFA referisi Əliyar Ağayevin idarə etdiyi görüş qonaqların qələbəsi ilə yekunlaşıb - 2:0. Hər iki qolu Namik Ələsgərov vurub.
25 yaşlı yarımmüdafiəçi 45+3-cü dəqiqədə penaltini dəqiq yerinə yetirib. 65-ci dəqiqədə isə o, dubl edib.
Bu qələbə sayəsində xalını 21-ə çatdıran "Neftçi" liderliyə yüksəlib. "Sabah" isə 10 xalla sonuncu pillədə qalıb.
Qeyd edək ki, turun ilk 3 oyununda "Qəbələ" evdə "Qarabağ"la 1:1, "Zirə" "Sumqayıt"la 2:2 hesablı heç-heçə edib, Keşlə" isə "Səbail"ə uduzub - 0:2.
-----------------------------------------------------------------
Azərbaycan Premyer Liqasında XII turun daha 2 oyunu keçirilib.
Sportnet.az-ın məlumatına görə, Zirədə eyniadlı komanda ilə "Sumqayıt" arasındakı matç 2:2 hesabı ilə başa çatıb.
Qarşılaşmada ilk qol 11-ci dəqiqədə vurulub. "Gənclik şəhəri" təmsilçisinin heyətində Murad Xaçayev fərqlənib. Meydan sahibləri 56-cı dəqiqədə Ağabala Ramazanovun qolu ilə hesabı bərabərləşdirsələr də, cəmi 1 dəqiqə sonra Rəhim Sadıxov yenidən "Sumqayıt"ı önə keçirib. 62-ci dəqiqədə "qartallar" növbəti dəfə tarazlığı bərpa ediblər. Qismət Alıyev adını tabloya yazdırıb. Bu heç-heçədən sonra xallarını 20-yə çatdıran "Zirə" 2-ci pillədəki mövqeyini qoruyub. "Sumqayıt" isə 16 xalla 4-cü sırada qalıb.
Digər oyunda "Səbail" səfərdə "Keşlə"ni 2:0 hesabı ilə məğlub edib. Qonaqlara qələbə qazanıdran qolları 11-ci dəqiqədə Ürfan Abbasov, 6 dəqiqə sonra isə Əfran İsmayılov vurub. Bu qələbədən sonra xallarını 13-ə çatdıran "dənizçilər" 5-ci pilləyə yüksəlib. Eyni xala malik "Keşlə" isə 6-cı sıraya geriləyib.
Qeyd edək ki, günün ilk matçında "Qəbələ" evdə "Qarabağ"la 1:1 hesablı heç-heçə edib. Tura hazırda davam edən "Sabah" - "Neftçi" görüşü ilə yekun vurulacaq.
-----------------------------------------------------------------------
Futbol üzrə Azərbaycan Premyer Liqasında XII tura start verilib.
Sportnet.az-ın məlumatına görə, günün ilk matçında "Qəbələ" "Qarabağ"ı qəbul edib.
Qəbələ şəhər stadionundakı qarşılaşma 1:1 hesabı ilə yekunlaşıb. Qonaqların heyətində Uroş Matiç 16-cı dəqiqədə penaltidən yararlana bilməyib. 30 yaşlı serbiyalı yarımmüdafiəçinin zərbəsini qapıçı Anar Nəzirov dəf edib.
İlk hissə qolsuz bərabərliklə yekunlaşıb. İkinci yarının əvvəllərində "Qarabağ" istəyinə çatıb. Filip Ozobiç 51-ci dəqiqədə fərqlənib. "Qəbələ" 70-ci dəqiqədə azlıqda qalıb. Rövlan Muradov ikinci sarı vərəqəni alaraq meydandan qovulub. 83-cü dəqiqədə isə meydan sahibləri bərabərlik qolunu vurub. Braziliyalı hücumçu Rafael Utriq "Qarabağ"ı mərkəzə dəvət edib.
Bu nəticədən sonra xallarının sayını 22-yə çatdıran və ən yaxın izləyicilərindən bir oyun az keçirən Ağdam klubu liderliyini möhkəmləndirilib. "Qəbələ" isə 11 xalla hələ ki, 6-cı sıradadır.
Qeyd edək ki, hazırda "Zirə" - "Sumqayıt" və "Keşlə" - "Səbail" matçları davam edir. Tura saat 17:15-də başlayacaq "Sabah" - "Neftçi" oyunu ilə yekun vurulacaq.
---------------------------------------------------
Bu gün Azərbaycan Premyer Liqasında XII turun oyunları keçiriləcək.
Sportnet.az-ın məlumatına görə, klubların heyətində koronavirusa kütləvi yoluxma ilə bağlı təxirə salınmış tur təqribən 3 həftəlik məcburi fasilədən sonra yenidən bərpa olunacaq.
"YAŞAT turu"nun ilk matçı Qəbələdə baş tutacaq. Şəhərin eyniadlı komandası doğma meydanda "Qarabağ"ı sınağa çəkəcək. Rəqibindən 1 oyun az keçirən Ağdam klubu 19 xalla turnir cədvəlinə başçılıq edir. Əyalət təmsilçisi isə 11 xalla 6-cıdır.
İndiyədək 47 dəfə üz-üzə gəlmiş komandaların duellərində meydan sahibləri 10, qonaqlar 24 qələbə qazanıblar, 13 görüş heç-heçə başa çatıb. Topların fərqi də də "köhlən atlar"ın xeyrinədir - 67:41. "Qarabağ" son 8 oyunda meydanı qolsuz tərk etməyib. "Qəbələ" 9 matçdır qalib gəlmir.
Eyni saatda başlayan matçlarda "Zirə" "Sumqayıt"ı, "Keşlə" "Səbail"i qəbul edəcək. Rəşad Sadıqovun başçılıq etdiyi komanda 19 xalla 2-ci sırada qərarlaşıb. 12 oyundan 15 xal toplayan "gənclik şəhəri" təmilçisi isə 4-cü pillədə qərarlaşıb.
Bu, iki komanda arasında 21-ci görüş olacaq. Daha əvvəl keçirilən qarşılaşmalarda "Zirə" 10, "Sumqayıt" 6 qələbəyə sevinib. 4 matçda qalib müəyyənləşməyib. "Qartallar"ın 27 qoluna Ayxan Abbasovun rəhbərlik etdiyi komanda 19 topla cavab verib. “Zirə” ardıcıl 7 oyunda meydanı qolsuz tərk etməyib. “Sumqayıt” son 3 matçda 2 qol vurub və uduzmayıb.
İndiyədək ölkə çempionatında 12 dəfə qarşılaşmış "Keşlə" və "Səbail" komandaları bugünkü matça baş məşqçisiz çıxacaqlar. Meydan sahiblərindən Yunis Hüseynov, qonaqlardan isə Aftandil Hacıyev koronavirusa yoluxduqları üçün texniki zonada yer almayacaqlar. "Keşlə" 13 xalla beşinci, 3 xal az toplayan "Səbail" isə sonuncudur.
Komandalar arasında keçirilmiş çempionat oyunlarında qələbə sayı baxımından Bayıl təmsilçisinin üstünlüyü nəzərə çarpır - 6:3. Üç qarşılaşmada isə heç-heçə qeydə alınıb. Top fərqində də "dənizçilər" öndədir - 14:11. “Səbail” son 4 oyunda uduzmayıb. “Keşlə” ardıcıl 4 ev matçında uduzub.
Tura Masazırda yekun vurulacaq. "Sabah" "Bank Resbuklika Arena"da "Neftçi" ilə münasibətlərinə aydınlıq gətirəcək. 18 xalı olan "ağ-qaralar" 3-cü pillədə qərarlaşıb. Visente Qomesin rəhbərlik etdiyi komanda isə 10 xalla axırdan 2-cidir.
Bu komandalar arasında indiyədək keçirilmiş 8 oyunun heç birində "Sabah" qələbə qazana bilməyib. Yalnız 1 görüş heç-heçə başa çatıb. Digər 7-də isə flaqman 3 xal əldə edib. "Neftçi" bu matçlarda 17 qol vurubsa, Masazır təmsilçisi cəmi 2 dəfə fərqlənib. “Neftçi” son üç oyunda qol buraxmayıb.
Azərbaycan Premyer Liqası, XII tur
20 dekabr (şənbə)
15:00. “Qəbələ” – “Qarabağ” - 1:1
Qol: Rafael Utrix, 83 - Filip Ozobiç, 50
Qeyri-dəqiq penalti: Uroş Matiç, 16 (Qarabağ)
Qırmızı vərəqə: Rövlan Muradov (Qəbələ), 69
Hakimlər: Rauf Cabarov, Namiq Hüseynov, Müslüm Əliyev, İnqilab Məmmədov
Hakim-inspektor: Zöhrab Qədiyev
AFFA nümayəndəsi: Əsgər Əmirəliyev
Qəbələ şəhər stadionu
16:00. “Keşlə” –“ Səbail” - 0:2
Qollar: Urfan Abbasov, 11. Əfran İsmayılov, 17
Hakimlər: Rəvan Həmzəzadə, Cəmil Quliyev, Vüqar Bayramov, Rəhim Həsənov
Hakim-inspektor: Ömər Paşayev
AFFA nümayəndəsi: Ramiz Mustafayev
“ASK Arena”
16:00. “Zirə” – “Sumqayıt” - 2:2
Qollar: Ağabala Ramazanov, 56, Qismət Alıyev, 62 - Murad Xaçayev, 11, Rəhim Sadıxov, 57
Hakimlər: Rəşad Əhmədov, Cavanşir Yusifov, Eyyub İbrahimov, Nicat İsmayıllı
Hakim-inspektor: Ceyhun Haşımov
AFFA nümayəndəsi: Seymur Səlimli
Zirə İdman Kompleksinin stadionu
17:15. “Sabah” – “Neftçi” - 0:2
Qollar: Namik Ələsgərov, 45+3 (penalti), 65
Hakimlər: Əliyar Ağayev, Akif Əmirəli, Elşad Abdullayev, Elçin Məsiyev
Hakim-inspektor: Anar Salmanov
AFFA nümayəndəsi: Mübariz Hüseynov
“Bank Respublika Arena”.
