Futbol üzrə Azərbaycan millisi DÇ-2022-nin seçmə mərhələsində ilk oyununu keçirib.
Sportnet.az-ın məlumatına görə, A qrupunda yer alan Canni De Byazinin başçılıq etdiyi kollektiv İtaliyanın Turin şəhərindəki “Yuventus” stadionunda Portuqaliya yığması ilə qarşılaşıb. Görüş nominal meydan sahiblərinin 1:0 hesablı qələbəsi ilə başa çatıb.
Oyun gözlənildiyi kimi portuqaliyalıların hücumları ilə başlayıb. Qapıçı Şahruddin Məhəmmədəliyev bir neçə epizodda komandasını qoldan xilas edib. O, əvvəlcə Joau Kanselunun, ardınca isə Kriştianu Ronaldunun zərbələrini zərərsizləşdirib. 19 və 27-ci dəqiqələrdə Dominquş Duarte qola yaxın olsa da, azacıq dəqiqlik çatışmayıb. Oyunda hesab 36-cı dəqiqədə açılıb. Kanselunun ötürməsindən sonra qolkiperin uzaqlaşdırmaq istədiyi top kapitan Maksim Medvedəvə dəyərək qapıya daxil olub.
İlk hissə Portuqaliya yığmasının minimal hesablı üstünlüyü ilə başa çatıb. Canni De Byazi ikinci yarıya 2 dəyişikliklə başlayıb. Fasilədən sonra Vüqar Mustafayevin yerinə İsmayıl İbrahimli, Abbas Hüseynovun əvəzinə isə Ukrayna “Minay”ının hücumçusu Anatoli Nuriyev oyuna daxil olub. Məhz bu əvəzetmələrdən sonra millinin oyunu müsbətə doğru dəyişib.
Yığma rəqib qapısı qarşısında ilk təhlükəli vəziyyəti 50-ci dəqiqədə yaradıb. Standart vəziyyət zamanı hava ötürməsini Əli Qurbani başla çərçivəyə göndərsə də, top qapının üstündən keçib. Az sonra Anatoli Nuriyev fərqlənməyə yaxın olub. Lakin bu dəfə də onun zərbəsi qeyri-dəqiq alınıb.
Komandalar son dəqiqələrdə qol vurmaq üçün çalışsalar da, hesab dəyişməyib və Azərbaycan millisi seçmə mərhələyə məğlubiyyətlə başlayıb.
Bu qarşılaşma ikinci hissədə meydana çıxan Anatoli Nuriyev və Aleksey İsayev üçün əlamətdar olub. Azərbaycan millisində ilk oyunlarını keçirən futbolçular yığmanın tarixinə müvafiq olaraq, 247 və 248-ci debütant kimi düşüblər.
Qeyd edək ki, bu qrupun digər oyununda Serbiya yığması evdə İrlandiyaya 3:2 hesabı ilə qalib gəlib.
---------------------
Futbol üzrə Azərbaycan millisi bu gün DÇ-2022-nin seçmə mərhələsində mübarizəyə başlayacaq.
Sportnet.az-ın məlumatına görə, A qrupunda yer alan yığma I turda Portuqaliya seçməsi ilə qarşılaşacaq. Koronavirus pandemiyası səbəbindən İtaliyanın Turin şəhərindəki "Yuventus" stadionunda keçiriləcək görüş Bakı vaxtı ilə saat 23:45-də start götürəcək.
Hər iki kollektiv matça itkilərlə çıxacaq. Meydan sahiblərinin heyətində Ruy Patrisiu, Pepe və Rafael Gerreyrunun zədə səbəbindən oynamayacağı dəqiqdir. Ruy Silvanın isə meydana çıxıb-çıxmayacağı sual altındadır.
Azərbaycan millisində isə yeganə itki Qara Qarayevin yoxluğudur. "Qarabağ"ın yarımmüdafiəçisi zədəli olduğu üçün Turinə aparılmayıb.
DÇ-2022-nin seçmə mərhələsi
A qrupu
23:45. Portuqaliya - Azərbaycan - 1:0
Qol: Maksim Medvedev, 36 (öz qapısına)
Hakimlər: Daniel Zibert, Yan Zaydel, Rafael Foltin, Saşa Stegemann (Almaniya)
İtaliya, Turin. "Yuventus" stadionu
Qeyd edək ki, bu qrupun digər oyunlarında Serbiya millisi İrlandiya ilə, Lüksemburq isə Qətərlə üz-üzə gələcək.
