Mahmud Qurbanovdan ŞOK AÇIQLAMALAR

Azərbaycan milli komandasını Norveç yığması ilə AVRO-2016-nın seçmə qrup matçına baş məşqçi qismində çıxarmış Mahmud Qurbanovun müsahibəsi

- Norveçlə oyunda meydana buraxdığınız start heyəti müəyyən söz-söhbətə səbəb oldu. Bəziləri hətta heyəti Mahmud Qurbanovun yox, AFFA rəhbərliyi müəyyənləşdidiyini də söylədi.
- Əvvəlcə onu qeyd edim ki, millinin Norveçlə qarşılaşmasından sonra mətbuata geniş açıqlama verməmişəm. Gözləyirdim ki, görüm KİV-də kimlər nə fikirlər səsləndirəcək. İndi məqam yetişib deyə bəzi məsələlərə toxunmaq istəyirəm. Norveçlə oyuna 25 futbolçunu düşərgəyə dəvət etmişdim. Məni tanıyanlar yaxşı bilir ki, heç vaxt sifarişlə iş görməmişəm. Hamının məsləhətini dinləyib, sonda öz bildiyimi etmişəm. Son qarşılaşmanın da start start heyətini özüm müəyyənləşdirmişdim. İndi bəziləri bir ağızdan "çərçivə"ni niyə Kamrana yox, Səlahətə etibar etdiyimi müzakirə edir. deyəsən bu insanlar millinin İtaliya və Xorvatiya ilə matçlarını yaddan çıxarıblar. Kamranı qapıda görmək istəyənlər yaxşı olardı ki, "Qəbələ”nin Premyer Liqa matçlarını izləsinlər. Hansı məşqçi formada olan futbolçunu heyətdən kənarda saxlayar?

- Millidə olan futbolçular da "çərçivə"nin Kamrana etibar olunmasın istəyirdi?
- Xeyr, bu sözlər komanda üzvlərinə aid deyil. Bu məsələni ən çox müzakirə edən futbol ictimaiyyəti idi. Mənə elə gəlir oyun da göstərdi ki, Səlahəti meydana buraxmaqla düzgün addım atmışam. Düzdü, ilk dəqiqələrdə onda müəyyən həyacan hiss olunsa da, vaxt ötdükcə özünə gəldi və bir neçə epizodda komandanı qoldan xilas etdi.

- "Qarabağ” oyunçuları Bədavi Hüseynovla Qara Qarayevi matça ehtiyat oyunçular skamyasında başlaması da gözlənilməz oldu. Halbuki bu futbolçular öz klubunda daim oynayırlar. Bu addımınızı necə izah edərdiniz?
- Elvini boyuna görə ilk dəqiqələrdən meydana buraxmağı lazım bildim. O, "ikinci mərtəbə"də inamlı oynadığına görə bu addımı atdım. Ancaq nədənsə bu addımım da geniş söz-söhbət yaratdı. Hamı Hüseynovu meydana buraxmalı olduğumu qabartdı. Məncə, Bədavini çox şişirtdilər. Başa düşmürəm niyə bir çoxları "Bədavi, Bədavi” deyib haray-həşir salıblar? Demirəm ki, o, pis oyunçudu. Xeyr, yaxşıdı. Avrokuboklarda, çempionat qarşılaşmalarında komandasına yardımçı olur. Ancaq Norveçlə oyunda fikirləşdiyim taktikaya Elvin daha uyğun gəlirdi. O da sağ olsun, verilən tapşırığı lazımınca yerinə yetirdi. Hava mübarizələrin heç birində uduzmadı. Buraxılan qolda da səhvi yox idi. Niyə demirlər ki, Mahmud yerli futbolçuya yığmada ilk rəsmi oyununa çıxmağa imkan yaratdı. Oyundan sonra bəzi məşqçilərin Bədavinin "Anji” məktəbi keçməsini xüsusi qabartması mənə çatmadı. Başa düşə bilmirəm məktəblərin buna aidiyyatı var? İndi Elvinə güvənməyək ki, bu yazıq Bədavi kimi futbola Dağıstanda yox, Qazaxda başlayıb. Bu nə yanaşmadı anlamıram.

- Bayaq qeyd etdiz ki, Kamran ideal formasından uzaq düşdüyü üçün "çərçivə"ni Səlahətə etibar etdiz. Bəs onda Ruslan Abışov niyə ilk dəqiqələrdən meydan da idi? Bilə-bilə ki, Abışov son ayyarımda zədə səbəbindən oyun təcrübəsindən məhrum olub. Onun mövqeyində oynayan Qara Qarayev isə daim klubunda meydana çıxır.
- Ruslan uzun müddət yığmada oynadığından təcrübəsinə bel bağladım. Onu da qeyd edim ki, yığmanın təlim-məşq toplanışında, U-21-lə qarşılaşmada Abışov çox yaxşı təsir bağışlamışdı. Norveçlə oyunda biz əsasən cinahlardan istifadə etməliydik. Ruslan da çarpaz ötürmə verməyi bacarır. U-21-lə test qarşılaşmasında o demək olar ki, işinin öhdəsindən gəldi. Təəsüfki, əsas məqamda Ruslanda alınmadı. İlk hissədə xüsusilə çox ötürmə səhvi ilə yadda qaldı. 65 dəqiqə gözlədim ki, bəlkə özünə gələr, bir düz ötürmədən sonra oyunu alınar. Ancaq bacarmadı.

- Abışov əvəzlənməsindən narazı qalmışdı. Sonradan məlum oldu ki, siz onu məhz oyununu "tapdığı” anda meydandan çıxartmısız. Buna münasibətiniz bilmək istərdik.
- Yox mən belə düşünmürəm. Mən ona yetərincə oynamaq şansı yaratdım. Son anadək ümid edirdim ki, Ruslan oyununu tapacaq. Vaxt isə azalırdı. Belədə onu əvəzləmək qərana gəldim. Bizim məqsədimiz xal almaq idi. Qaraya gəlincə, hər dəfə yığmanın toplanışlarında özünə də deyirəm, dayaq yarımmüdafiəçi ancaq geri oynamamlıdı. Müasir futbolda bu mövqeinin oyunçularının çıxışı komandanın oyun modelini müəyyənləşdirir. Fikir vermisizsə, top Qarada olanda daha çox geriyə ötürmə edir. Bu isə sürətli hücumun qarşısını alır. Sevindirici haldı ki, futbolçu tənqiddən nəticə çıxarmağı bacarır. Norveçlə matçda meydana sonradan çıxmasına baxmayaraq oyuna yaxşı qoşuldu və 2-3 epizodda irəli yaxşı ötürmələr verdi. Bu da onu göstərir ki, futbolçu məşqçinin ondan nə istədiyini başa düşür.

- Bəs Dmitri Nazarovu niyə ikinci hissədə meydana buraxdınız?
- Bir vaxtlar Foqtsun legionerləşdirmə siyasətindən narazı qalan futbol mütəxəssislərimiz çayxanalarda "bu, bizim yox, almanların millisidi” söyləyənlər, nədənsə Nazarova görə yaman haray-həşir saldılar. Bəlkə də bir çoxları heç bilmir ki, Nazarov Almaniyanın hansı divizionunda top qovur. Sadəcə tənqid xatirinə "gərək Cavidin yerinə Nazarov oynayardı” kimi açıqlamalar verməklə yadda qaldılar. Mənə maraqlıdı: niyə bəzi yerli məşqçilərimiz Foqts Maksimi dayaq yarımmüdafiəçi kimi oynadanda, Bədavininin mövqeyini dəyişəndə ağızlarına su alıb durmuşdular. Heç efirdə, mətbuatada almanı tənqid etmirdilər. Hələ deyirdilər ki, Foqts düz edir. Peşəkar futbolçu hər mövqedə oynamaldı. Ancaq Nazarovu meydana buraxmamışam deyə məni az qala xalq düşməni çıxardırlar. Çox maraqlıdı ki, 6 il səsi çıxmayan mütəxəssislər Norveçlə oyundan sonra bülbül kimi cəh-cəh vurmağa başladılar. Bu da mənə çatmır. Görəsən, niyə üzdə "Mahmud, sən hər şeyi düz etmişdin” deyən bəzi yerli məşqçilər gedib başqa yerlərdə dalımca danışırlar. Sözün var, səhvim var kişi kimi sözü üzümə söylə. Hamısı da yaxşı bilirdi ki, Mahmud yalnız bir oyunda milliyə rəhbərlik edəcək. Özümdə bu haqda açıqlama vermişdim. 6 il danışmağa özündə cürət tapmayanlar, noyabrın 17-dən ağızlarını açıb, gözlərini yumublar. O da maraqlıdı ki, məni tənqid edənlər, heyəti müəyyənləşdirərkən səhv etdiymi söyləyənlər, nədənsə oyundan öncə və sonra Norveçi ictimaiyyətə zəif rəqib kimi qələmə verməyə çalışırdılar. Fürsətdən istifadə edərək, Tərlan Əhmədova minnətdarlığımı bildirmək istəyirəm. Tərlan müəllim sağ olsun ki, AZAL-ın fiziki hazırlıq üzrə məşqçisi Kolesnikova millidə mənə yardımçı olmağına şərait yaratdı. Yenə o fikirdə qalıram ki, heyətlə bağlı hansısa səhvə yol verməmişdim. Bizim zəif yerimiz "ikinci mərtəbə” idi ki, rəqib də bundan yararlana bildi. O problemi də Mahmud yox, kim olur-olsun, bir oyuna aradan qaldıra bilməz. Topa sahib olmada, ikili mübarizədə və adını çəkmədiyim digər meyarlarda rəqibdən geri qalmadığımızı düşünürəm. Mən aciz adam deyiləm. Sadəcə bu müddətdə sakit durub kimin nə danışacağını gözlədim. Və eşitdiklərimdən məyus oldum. Hərdən öz-özümə fikirləşirəm ki, "Mahmud, bəlkə sən millini Avropa çempionatının final mərhələsinə çıxmaqdan məhrum etdin” və buna görə bu qədər üstümə gəldilər. Məni qınayanlar, səhv etdiymi fikirləşənlər onu da yaddan çıxarmasınlar ki, Xorvatiyaya böyükhesablı məğlubiyyətdən sonra futbolçuları motivasiya etmək, onlarda özünəinamı formalaşdırmaq heç də asan deyildi.

- Qeyri-adi heç nə baş verməsə, yəqin ki, yığma Robert Prosineçkiyə tapşırılacaq. Məşqçilər korpusunda işini davam etdirəcəksiniz?
- Etimad göstərsələr, AFFA rəhbərliyi və yeni baş məşqçi qalıb işimi davam etdirməyimi istəsə məmuniyyətlə işləyərəm.

- Necə düşünürsüz bu gün millidə yer alan futbolçularla böyük hədəflərə çatmaq mümkündü?
- Məncə, yeni gələn çalışdırıcı islahatlara başlayacaq. Çünki, U-17 və U-19-un Avropa çempionatının elit raunduna vəsiqə qazanması göstərdi ki, bizdə gənc potensiallı futbolçular var. Onları tədricən əsas yığmaya cəlb edib, püxtələşməsinə çalışmalıyıq. Yəqin ki, Prosineçki də bu cür addım atacaq.

- Yığmanı baş məşqçi kimi oyuna çıxartmaq xüsusi hissdi, yoxsa məşqçi üçün klub və yığma eynidi?
- Məncə, bu sualı kiməsə versəniz, eyni cavabı eşidərsiz. Milli bütün ölkəni təmsil edir və onun məşqçisi olmaq hər adama qismət olmur. heç şübhəsiz ki, yığmada işləmək, onu oyuna çıxartmaq özəl hissdi. Ancaq bir məqama görə təəsüflənirəm.Yığma üzvləri noyabrın 4-də bir araya gəldi. Yalnız Kamran Ağayev heç kimə heç nə demədən ertəsi düşərgəyə təşrif buyurdu. Və gəldi bəhanələr gətirdi ki, nəsə başqa təxirə salınmaz işi olub (Qurbanov konkret fakt söyləməsə də, əldə etdiyimiz bilgiyə görə qapıçı gecikməsini ayın 4-də bankda işlərinin olmasıyla əlaqələndirib).Halbuki uşaqların hamısına əvvəlcədən demişdim ki, bircə ölüm-itim olsa, kiməsə icazə veriləcək. Bütün başqa işləri oyundan sonraya saxlasınlar. Ancaq Ağayev intizamı pozdu. Mən gərək onu yığmanın düşərgəsindən qovaydım. Sadəcə, məsul oyun ərəfəsində düşərgədə ab-havanı pozmaq istəmədim. Bəlkə də bununla səhv etdim. Belə futbolçular ilk növbədə özlərinə pislik edirlər. Niyə Kamran Foqtsun 6 illik dönəmində belə etməmişdi? Bəlkə ona elə gəlir ki, yerli məşqçi olanda istədiyini edə bilər? Yenə deyirəm yalnız ab-havanı pozmamaq üçün, onun səhvinə göz yumdum. Sonra deyəcəkdilər ki, bir oyunluq gəldi, aranı qatıb getdi. (Futbol+)