"Çətin oyun oldu. Ən çətini o idi ki, bu qarşılaşma yeni komanda, Robert Prosineçki üçün ilk rəsmi oyun idi. Bunu unutmaq lazım deyil". Sportnet.az-ın məlumatına görə, bu sözləri AFFA-nın baş katibi Elxan Məmmədov deyib.
Malta ilə qarşılaşmadan sonra jurnalistlərin suallarını cavablandıran Məmmədov bunları bildirib: "Bu səbəbdən çox riskli bir an idi. Meydanda yeni komanda, yeni sistem gördük. Oyunun axırında vurulan qol onu göstərdi ki, komanda son saniyəyə qədər mübarizə aparır".
- Robert Prosineçkinin hədsiz dərəcədə həyəcanlı olmağının səbəbi nə idi?
- Gördüm ki, o, 90 dəqiqə oturmadı. Təbii ki, məşqçi olaraq həyəcan keçirdir. O "Kayserispor"da olanda da oturmurdu. Əgər həyəcanlanır, əsəbləşirsə, demək komandaya ürəyi yanır. Bu normaldır. Çünki özümüz də baxanda həyəcan keçiririk və üstəlik o məşqçidir, 10 qat daha həyəcan keçirir. İlk oyun olduğu üçün ancaq 3 xal gözləyirdi.
- Yəqin ki, qələbəyə gröə futbolçular mükafatsız qalmayacaq...
- Təbii ki, bir sistem var və bu sistemə uyğun hesablama aparacağıq. Rövnəq Abdullayev bununla bağlı açıqlama da verib. Futbolçular milli komandadan heç bir maaş almırlar. Onlar öz klublarından pul alır. Milli komandada oynamaq onlar üçün fəxrdir, amma maliyyə motivasiyası da olacaq. Bəzi federasiyalar milli komandaya düşən futbolçulara maaş verir. Bəzi futbolçular sponsorlardan pul alır. Biz isə rəqibdən asılı olaraq nəticəyə uyğun mükafat verilir. Sonuncu mükafat 1 ildən də artıq vaxtdır ki, verilib.
- Eddi İsrafilovun çıxışı sizi qane etdi?
- "Qranada"da oynayan bir futbolçu niyə də milliyə çağırılmasın? Düzdü, Maltaya qarşı az oynadı, amma bu baş məşqçinin qərarıdır. Fikrimcə bu taktiki bir gediş idi.
- Azarkeşlərin oyuna marağından nə dərəcədə razı qaldınız?
- Bayramları nəzərə almaq lazımdır. Bakı sakinləri demək olar ki, bu gün şəhərə qayıdırlar. Püşkatma olanda heç kim bilmirdi ki, bu gün belə olacaq. Bu səbəbdən çox adam olmayacağını bilirdik.
