"Mənə etimad göstərdiklərinə görə, Məşqçilər Komitəsinə və AFFA rəhbərliyinə təşəkkürümü bildirirəm. Çalışacağam ki, bu etimadı doğruldum". Sportnet.az-ın məlumatına görə, bunu 17 yaşadək futbolçulardan ibarət Azərbaycan yığma komandasının yeni baş məşqçisi Təbriz Həsənov affa.az saytına açıqlamasında deyib.
Təyinatı və gələcək planları ilə bağlı danışan gənc mütəxəssis hazırkı heyətlə U-15 yığmasından birgə çalışdığını xatırladıb. O, gələn il Azərbaycan keçiriləcək Avropa çempionatının final mərhələsinə ciddi hazırlaşmalı olduqlarını bildirib: "Əlbəttə, necə böyük məsuliyyəti üzərimizə götürdüyümüzü yaxşı bilirik. Aydın məsələdir ki, Avropa çempionatının final mərhələsinə yüksək səviyyəli komandalar vəsiqə qazanır. Komanda üzvləri ilə psixoloji söhbətlər edirik. Çalışırıq uşaqları böyük məsuliyyət haqda düşündürək və onları Avropa çempionatına motivasiya edək. Yaxşı bilirik ki, Avropa çempionatının final mərhələsinə yüksələn komandalar səviyyə, sürət, fiziki və psixoloji baxımdan çox hazırlıqlı vəziyyətdə olurlar.Onlara qarşı tam başqa cür hazırlaşmalıyıq. Hazırlığımız planlı şəkildə davam edir. Bu həftə ölkəmizdə UEFA-nın İnkişaf turniri keçiriləcək. Çalışacağıq ki, yaxşı oyun nümayiş etdirməklə yanaşı, komandadakı çatışmazlıqları görək və onları aradan qaldırmaq istiqamətində işlər aparaq".
Həsənov seleksiya işlərinin yenə davam etdiriləcəyini və təkcə yerli deyil, xaricdə çıxış edən futbolçuların da yığmaya cəlb olunacağını açıqlayıb: "Azərbaycanda oynayan uşaqların demək olar ki, hamısını sınaqdan keçirmişik. Ən yaxşılar komandaya cəlb olunub. Təbii ki, bununla kifayətlənməyəcəyik. Seleksiya işlərini davam etdirəcəyik. Çünki ölkəmizdən kənarda da çıxış edən futbolçularımız var. Yaxın zamanlarda onları da yığmaya cəlb edəcəyik. Təəssüf ki, onları hər zaman toplanışlara dəvət etmək imkanımız olmur. Klublarından gəlmələri ilə bağlı problem ortaya çıxır. Onları gələcəkdə komandaya dəvət edəcəyik ki, həm yığmamız güclənsin, həm də komanda daxilində rəqabət artsın. Komandada rəqabət olarsa, futbolçular daha çox inkişaf edər".
Qeyd edək ki, Təbriz Həsənov Avropa çempionatının elit-raundundakı uğursuzluqdan sonra U-17 yığmasından istefa vermiş Mirbağır İsayevi əvəzləyib.
