"The Black Eyed Peas” qrupu və Nikol Şerzinger 23- 25 iyundan Bakıda keçiriləcək Formula 1 Azərbaycan Qran Prisi ərəfəsində Bakıda konsert proqramı ilə çıxış edəcəklər. Bu barədə Sportnet.az-a Bakı Şəhər Halqası Əməliyyat Şirkətindən (BŞH) məlumat verilib.
Musiqi dünyasının ən məşhur ulduzlarından olan N.Şerzinger və "The Black Eyed Peas” qrupu iyunun 24-də Bakıda yarışı izləməyə gələnlərə canlı konsert verəcəklər. Axşam saatlarında dənizkənarı bulvar ərazisində yerləşən böyük səhnəyə əvvəlcə Nikol Şerzinger, ardınca isə "The Black Eyed Peas” qrupunun üzvləri çıxacaqlar.
BŞH-nin icraçı direktoru Arif Rəhimov hər iki iştirakçının 2017 Formula 1 Azərbaycan Qran Prisi ərəfəsində canlı konsert proqramı ilə çıxış etmək üçün Bakıya edəcəyi səfərdən böyük məmnunluq duyduğunu bildirib: "Musiqi dünyasının ən çox tanınan ulduzlarının Bakıya konsert proqramı üçün gəlişi bizi yüksək həddə sevindirir və qürurlandırır. "The Black Eyed Peas” qrupunun hər bir üzvü və Nikol Şerzinger özünü isbat etmiş dünya ulduzlarıdır və onlar bir müğənnidən gözlənilənləri tam şəkildə gerçəkləşdirən ali dərəcəli musiqişünaslardır. Musiqi ilə Formula 1 hər zaman bir arada olmaqla yanaşı öz yaradıcı sərhədlərini aşmağa çalışır. Ulduzların adlarının elan olunması bu baxımdan sözügedən möhtəşəm ənənəni davam etdirir. Bu səbəbdən 2017 Formula 1 Azərbaycan Qran Prisini qaçırmaq olmaz və biz iyun ayında Bakıda baş tutacaq yarış həyəcanı və əyləncə coşğusunu birlikdə yaşamaq üçün hamınızı indidən səbrsizliklə gözləyirik”.
Dənizkənarı bulvarda yerləşən əyləncə zonasına çıxış imkanı verən biletləri əldə edən hər kəs yarış həftəsonu günlərinin hər axşamı burada baş tutacaq konsert proqramlarında iştirak edə biləcəklər. Bununla yanaşı, dördgünlük bileti olanlar cümə axşamı günü - iyunun 22-də Pit Yolu Gəzintisinə qatılmaq imkanına sahib olacaqlar.
Qeyd edək ki, daha əvvəl Türkiyənin məşhur sənətçisi Tarkan Formula 1 Azərbaycan Qran Prisinin iyunun 23-də keçiriləcək açılış mərasimində iştirak edəcəyi açıqlanmışdı.
