Bu gün Azərbaycan Premyer Liqasında XV turun daha 2 oyunu keçiriləcək.
Sportnet.az-ın məlumatına görə, ilk matç Yevlax şəhər stadionunda "Kəpəz" və "Qəbələ" komandaları arasında təşkil olunacaq.
Saat 14:00-da başlanacaq görüşü baş hakim Rəvan Həmzəzadə idarə edəcək.
Hazırda "Qəbələ" 13 oyundan 8 xalla 10-cu, "Kəpəz" 14 matçdan 6 xalla 11-ci yerdə gedir. Gəncə təmsilçisi qələbə təqdirində, rəqibini üstələyərək, 1 pillə irəliləyəcək.
Bu, iki komanda arasında çempionatda yubiley - 30-cu görüş olacaq. Əvvəlki oyunların 9-da "Kəpəz", 12-də "Qəbələ" qələbə qazanıbsa, daha 8 qarşılaşma heç-heçə ilə yekunlaşıb. Topların nisbətində də "qırmızı-qaralar" üstündür - 37:27.
Son iki şəxsi görüşdə qol vuran komanda qalib gəlib. “Qəbələ” axırıncı 6 səfərdə qol vurub.
Günün son qarşılaşması isə "Azersun Arena"da "Qarabağ" və "Araz-Naxçıvan" arasında gerçəkləşəcək. İlk oyun günündə "Sabah" səfərdə "Turan Tovuz"a 3:1 hesabı ilə qalib gələrək, Ağdam təmsilçisini "taxtdan salıb". Yenidən əvvəlki mövqeyinə qayıtmaq üçün baş məşqçi Qurban Qurbanovun kollektivinə ən azı heç-heçə lazımdır.
14 oyundan 23 xalla 6-cı yerdə gedən Naxçıvan təmsilçisinə də irəliləmək və ilk oyun günündə "Şamaxı"ya səfərdə 1:2 hesabı ilə uduzan "Zirə" ilə fərqi minimuma endirmək üçün 3 xal vacibdir.
İki kollekivin əvvəlki 13 matçının 9-da "Qarabağ", 3-də "Araz-Naxçıvan" qələbə qazanıb, 1 görüş heç-heçə ilə yekunlaşıb. Topların nisbətində Ağdam təmsilçisinin simmetrik üstünlüyü var - 31:13.
“Qarabağ” bütün matçlarda qol vurub. Son 5 oyunda isə Ağdam klubu qalib gəlib.
Azərbaycan Premyer Liqası, XV tur
14 dekabr (bazar)
14:00. “Kəpəz” – “Qəbələ”
Hakimlər: Rəvan Həmzəzadə, Cəmil Quliyev, Gülnurə Əkbərzadə, Əkbər Əhmədov
VAR: Cavid Cəlilov
AVAR: Emin Əliyev
Hakim-inspektor: Şahin Cəfərov
AFFA nümayəndəsi: Mübariz Hüseynov
Yevlax şəhər stadionu
17:30. “Qarabağ” – “Araz-Naxçıvan”
Hakimlər: Rəşad Əhmədov, Müslüm Əliyev, Eyyub İbrahimov, Elvin Bayramov
VAR: Tural Qurbanov
AVAR: Asiman Əzizli
Hakim-inspektor: Babək Quliyev
AFFA nümayəndəsi: Kifayət Mustafayeva
“Azersun Arena”
Qeyd edək ki, turun son 2 görüşü dekabrın 15-də keçiriləcək.
