"Çətin oyun alındı. İlk hissəyə yaxşı başlasaq da, sonradan çətinliklə üzləşdik”.
Sportnet.az-ın məlumatına görə, bunu "Sumqayıt”ın baş məşqçisi Samir Abbasov Topaz Premyer Liqasının XV turunda səfərdə "Zirə” ilə 1:1 hesablı heç-heçə etdikləri oyundan sonra deyib.
Gənc mütəxəssis komandasının çıxışından narazılıq ifadə edib: "Böyük hesabla məğlub ola bilərdik. Bundan sonrakı matçlarda ikinci hissədəki kimi oynasaq, çempionatı 7-ci pillədə başa vura bilərik. Bu gün bəzi futbolçularımız oyunun tez başa çatmasını istəyirdilər. Yaxşı oynamaq istəyiriksə, bəzi futbolçularmız peşəkarlaşmalıdır”.
- Əvəzetmələriniz ümidləri doğrultmadı. Bu fikirlə razısınız?
- 3 əvəzetmə etdim və yalnız Ülvi İsgəndərovun oyunundan razı qaldım. Nicat Qurbanov isə istədiyimizi edə bilmədi. Belə oynadısa, deməli, onu oyuna daxil etməməli idim. Nicat bir neçə klubda belə çıxış edib və dərs çıxarmasa, yaxşı olmayacaq.
- Hakim idarəçiliyindən razısınız?
- Bu dəqiqə desəm ki, baş hakimdən narazıyam, mənə cərimə düşəcək?
- Bəli...
- O zaman danışmaq istəmirəm.
