"Neftçi"nin yeni prezidenti Kamran Quliyev "Sumqayıt"la səfərdə keçirdikləri Topaz Premyer Liqasının XVI tur matçını izləməyə gəlməyib. Sportnet.az-ın "Kapital Bank Arena"da olan əməkdaşının verdiyi məlumata görə, Quliyev keçmiş klubu ilə oyunu stadionda canlı izləməməyi qərara alıb.
Əvəzində arenaya "Neftçi"nin Müşahidə Şurasının sədri Çingiz Abdullayev, Peşəkar Futbol Liqasının prezidenti Ramin Musayev və "Sumqayıt"ın yeni prezidenti olacağı bildirilən Zaur Hacı-Məhərrəmov fəxri tribunada yerlərini alıb. Bundan başqa AFFA baş katibinin müavini Sərxan Hacıyev və Azərbaycan millisinin qapıçılarla işləyən məşqçisi Dmitri Kramarenko da stadiondadır.
