UEFA Çempionlar Liqasında ikinci finalçı müəyyənləşib.
Sportnet.az xəbər verir ki, yarımfinal mərhələsinin digər cavab matçında İngiltərənin "Tottenhem" komandası Hollandiyada "Ayaks"ı 3:2 hesabı ilə yenərək, iki oyunun yekununda mübarizədən kənarlaşdırıb. Londondakı ilk matçda rəqibinə 0:1 hesabı ilə uduzan "Tottenhem" cavab görüşündə səfərdə daha çox qol vurduğu üçün finala adlayıb.
Hərçənd, ilk 2 qolu məhz "Ayaks" vurub. Kapitan Matteys De Liqt 5-ci, Hakim Ziyeş isə 36-cı dəqiqədə fərqlənib. Lakin fasilədən sonra "Tottenhem" fəallaşaraq, bu qolların əvəzini çıxıb. Lukas Moura 55 və 59-cu dəqiqələrdə fərqlənərək, hesabı bərabərləşdirib. London komandası finala yüksəlmək üçün lazım olan daha bir qolu isə 90+6-cı dəqiqədə vurub.
Beləliklə, "Tottenhem" tarixində ilk dəfə Çempionlar Liqasının finalına yüksəlib. İyunun 1-də İspaniyanın paytaxtı Madriddəki "Metropolitano" stadionunda keçiriləcək həlledici qarşılaşmada rəqib İngiltərənin daha bir təmsilçisi "Liverpul" olacaq. "Liverpul" yarımfinalda İspaniya "Barselona"sını iki oyunun yekununda mübarizədən kənarlaşdırıb - 0:3, 4:0.
---------------------
Bu gün UEFA Çempionlar Liqasında ikinci finalçı müəyyənləşəcək.
Sportnet.az xəbər verir ki, yarımfinal mərhələsinin digər cavab matçında "Ayaxs" Hollandiyada "İngiltərə"nin "Tottenhem" kollektivini qəbul edəcək. İlk matçda rəqibinə 0:1 hesabı ilə uduzan London təmsilçisi məğlubiyyətin əvəzini çıxmağa çalışacaq. Amsterdam klubuna final üçün istənilən heç-heçə sərf edəcək. "Tottenhem" isə ən azı iki top fərqi ilə qələbə qazanmalıdır. Qonaqların 1:0 hesablı qələbəsi qarşılaşmanı əlavə vaxta aparacaq.
Hər iki komandanın heyətində cəzalı oyunçu olmasa da, zədəlilər var.
Meydan sahiblərində Karel Eytinq və Hassan Bandenin matçı buraxacağı dəqiqdir. London klubu isə Harri Vink, Erik Lamela və Harri Keynin xidmətindən yararlana bilməyəcək. Yan Vertongen və Serj Oryenin durumuna isə oyun vaxtı aydınlıq gələcək.
"Ayaks" qrup mərhələsindən sonra ardıcıl olaraq İspaniya "Real Madrid"ini və İtaliya "Yuventus"unu mübarizədən kənarlaşdırıb. "Tottenhem" isə Almaniyanın "Borussiya" (Dortmund) və ölkəsinin digər komandası "Mançester Siti"dən güclü olub.
Çempionlar Liqası
Yarımfinal, cavab oyunu
8 may
23:00. "Ayaks" (Hollandiya) - "Tottenhem" (İngiltərə) - 2:3
Qollar: Matteys De Liqt, 5. Hakim Ziyeş, 36 - Lukas Moura, 55; 59; 90+6
Baş hakim: Feliks Brıx (Almaniya)
Amsterdam. "Yohan Kroyf Arena"
İlk oyun - 1:0
Qeyd edək ki, bu cütün qalibi finalda İngiltərə "Liverpul"u ilə üz-üzə gələcək.
