Futbol üzrə Avropa çempionatında B qrupunun növbəti oyunu keçirilib.
Sportnet.az-ın məlumatına görə, Sankt-Peterburqdakı eyniadlı stadionda Rusiya və Belçika yığmaları üz-üzə gəlib. Görüş Belçikanın böyük hesablı qələbəsi ilə yekunlaşıb - 3:0. Qollardan ikisini 10-cu və 89-cu dəqiqələrdə Romelu Lukaku vurub. Daha bir qolun müəllifi isə 34-cü dəqiqədə Tomas Mönyö olub.
Qrupun digər oyununda Finlandiya Danimarkanı məğlub edib - 1:0.
----------------------------
Futbol üzrə Avropa çempionatında B qrupunda mübarizəyə start verilib.
Sportnet.az-ın məlumatına görə, turun açılış oyununda Danimarka və debütant Finlandiya ilə üz-üzə gəlib. 42-ci dəqiqədə meydan sahiblərinin futbolçusu Kristian Eriksen huşunu itirərək, yerə yıxılıb. Nəticədə matçda fasilə yaranıb. Ölüm təhlükəsi ilə üz-üzə olan 29 yaşlı yarımmüdafiəçi ilkin tibbi yardımdan sonra xəstəxanaya çatdırılıb. İki saatlıq fasilədən sonra UEFA Eriksenin səhhətinin qaydasına düşdüyünü bildirərək, "davam" qərarı verib. Görüş qaldığı yerdən davam etdirilib.
Hesab isə 60-cı dəqiqədə açılıb. Yoel Pohyanpalo fərqlənərək, Finlandiya millisinə qələbə qazandırıb. 74-cü dəqiqədə Danimarka millisinin bərabərlik qolunu vurmaq imkanını Pyer-Emil Heybyerq penaltini dəqiq yerinə yetirməməklə qaçırıb.
Qeyd edək ki, B qrupunda ilk turun digər görüşü Belçika və Rusiya yığmaları arasında keçirilir. Hələlik Belçika öndədir - 1:0.
---------------------------------
Bakı Olimpiya Stadionunda keçirilən Avropa çempionatının A qrupunun Uels - İsveçrə oyunu başa çatıb.
Sportnet.az-ın məlumatına görə, qarşılaşma 1:1 hesabı ilə yekunlaşıb.
İlk hissədə hər iki komanda təhlükəli epizodlar yaratsa da, qol vurulmayıb. Görüşdə hesab 49-cu dəqiqədə açılıb. İsveçrənin heyətində Bril Embolo rəqibi mərkəzə dəvət edib. 74-cü dəqiqədə isə Kiffer Mur bərabərlik qoluna imza atıb.
84-cü dəqiqədə İsveçrə yığmasından Mario Qavranoviç topu rəqib qapısından keçirib. Lakin baş hakim Kleman Türpen VAR-dakı referilərə müraciət etdikdən sonra oyundankənar vəziyyət olduğunu bildirib və qolu qeydə almayıb.
A qrupunun ilk oyununda İtaliya Türkiyəni 3:0 hesabı ilə məğub edib.
Qeyd edək ki, təqvimə əsasən, Bakı Olimpiya Stadionu A qrupunun İsveçrə - Uels matçı ilə yanaşı, Türkiyə - Uels və Türkiyə - İsveçrə qarşılaşmalarına, eləcə də 1/4 final mərhələsinin 1 oyununa ev sahibliyi edəcək.
------------------------------------------------------------------------
Bu gün futbol üzrə Avropa çempionatının daha üç oyunu keçiriləcək. Sportnet.az-ın məlumatına görə, A qrupunda bir, B qrupunda isə iki matç olacaq.
A qrupundakı Uels - İsveçrə görüşü Bakı Olimpiya Stadionunda olacaq. Bu, Azərbaycan paytaxtında gerçəkləşəcək ilk qarşılaşmadır. Fransalı Kleman Turpenin idarə edəcəyi oyun saat 17:00-da start götürəcək.
Matça 16 mindən çox bilet satılıb. Komandalar böyük turnirlərin final mərhələlərində ilk dəfə üz-üzə gələcəklər. İndiyədək iki yığma arasında oynanılmış 7 oyunun 5-də İsveçrə, 2-də isə Britaniya təmsilçisi qələbə qazanıb. Komandalar heç vaxt heç-heçəyə razılaşmayıb.
İsveçrə qatıldığı son 3 nüfuzlu turnirdə DÇ-2014, AVRO-2016 və DÇ-2018-də qrupdan çıxmağı bacarıb. Hər üç yarışın 1/8 finalında uduzan komanda əvvəlki uğurunu növbəti dəfə təkrarlamaq istəyir. Uels isə 2016-cı ildə Fransadakı qitə çempionatının yarımfinal mərhələsinə kimi adlayıb.
B qrupunda turnirin iddialı komandalarından, hazırda FIFA reytinqində ilk pillədə qərarlaşan Belçika Rusiya ilə, Danimarka isə Avropa çempionatının debütantı Finlandiya ilə üz-üzə gələcək.
Avropa çempionatı
A qrupu, I tur
17:00. Uels - İsveçrə - 1:1
Qollar: Kiffer Mur, 74 - Bril Embolo, 49
Hakimlər: Kleman Türpen, Nikolya Dano, Siril Qrenqor (Fransa)
Dördüncü hakim: Srcan Yovanoviç (Serbiya)
Bakı. Bakı Olimpiya Stadionu
B qrupu
20:00. Danimarka - Finlandiya - 0:1
Qol: Yoel Pohyanpalo, 60
İstifadə olunmamış penalti: Pyer Emil Heybyerq, 74 (Danimarka)
23:00. Belçika - Rusiya - 3:0
Qollar: Romelu Lukaku, 10; 89. Tomas Mönyö, 34
Qeyd edək ki, təqvimə əsasən, Bakı Olimpiya Stadionu A qrupunun İsveçrə - Uels matçı ilə yanaşı, Türkiyə - Uels və Türkiyə - İsveçrə qarşılaşmalarına, eləcə də 1/4 final mərhələsinin 1 oyununa ev sahibliyi edəcək.
