Lövün taktiki dühası

2010-cu ilin yayı idi. Cənubi Afrika Respublikasında dünya çempionatının oyunları gedirdi. Mən isə həmin ərəfədə Bakı şəhərində C kateqoriyalı məşqçi kursunda oxuyurdum. Müəllimimiz Almaniya Futbol Federasiyasından dəvət olunmuş UEFA təlimatçısı Nikolay Adam idi. Oyunlar artıq yarımfinala gəlib çatmışdı. Almaniya - İspaniya oyunu günü Adam bizi tez buraxdı və bildirdi ki, matç vaxtı onun otağından çığır-bağır gəlsə, qorxmayaq. Təbii ki, bu, həm də bir zarafat idi. 

Bəli, oyun başladı və biz AFFA-nın Futbol Akademiyasının ikinci mərtəbəsində divana yayxanaraq, geniş ekranlı monitorda İspaniyanın ifasında parlaq oyuna şahidlik etdik. Hesab da elə İspaniyanın 1:0 hesablı qələbəsi ilə başa çatdı. Gecə oyun qurtaran kimi kursda oxuyan "Neftçi”nin keçmiş futbolçusu, əla yumoru ilə seçilən Arzu Mirzəyev dəhlizdə gəzə-gəzə "Nemes bizi sabah ...” deyib bizi xeyli güldürdü. 

Səhəri gün Adam səhər yeməyinə hamıdan gec gəldi. Təbii ki, ovqatı təlx idi, hətta deyəsən, Almaniyanın zəif oynaması səbəbindən bir az da utanırdı. Elə bu zaman ispanların azarkeşi olan "Bakılı”nın keçmiş oyunçusu Vüqar Qurbanov "İspaniya” deyib qışqırdı. Almanın üzündə acı qarışıq qəribə bir təbəssüm yarandı.

Nə isə, sözüm bunda deyil. Səhər yeməyi yeyib stadiona getdik və orada alman dedi ki, dünən İspaniya əla oynadı və layiqli qələbə qazandı. Əlavə etdi ki, nəzəri məşğələdə bu oyunu müzakirə edəcəyik. Bəli AFFA-nın akademiyasının iclas zalına yığldıqdan sonra məşgələmiz başladı və alman müəllimimiz dedi ki, mən sizi dinləyirəm. Oxumağa gələn əksəri keçmiş futbolçulardan ibarət olan kurs iştirakçıları növbə ilə oyun barədə müxtəlif fikirlər bildirdilər. Nəhayət mən də söz aldım və bildirdim ki, İspaniya heyət baxımından güclü idi və buna görə də qalib gəldi. Lakin mən taktiki cəhətdən Yoahim Lövü Visente Del Boskedən daha güclü sayıram. Məhz bu amilə görə Almaniya qalib gələ bilərdi və Lövdan oyunu gedişinə təsir edə biləcək taktiki gediş gözləyirdim, lakin bunu görmədim.

Nikolay Adam soruşdu: "Siz nəyə əsasən deyirsiniz ki, Löv Del Boskedən taktiki cəhətdən güclüdür?” Cavab verməyə çətinlik çəkdim və yalnız bunu əlavə edə bildim: "İndi konkret bir səbəb göstərə bilmərəm, amma dəqiq bilirəm ki, bu, belədir”. Müəllimiz isə dedi ki, istənilən fikir sübuta söykənməlidir. Məndən sonra söz alan, indi "Qəbələ”də işləyən Sənan Qurbanov isə heç də Del Boskeni zəif saymadığını söylədi və İspaniya "Real Madrid”indəki uğurlarını sadaladı. Bu sözləri mənə cavab kimi də qiymətləndirmək olardı. Halbuku Del Boskenin zəif olduğunu yox, taktiki zəhətdən Lövün daha güclü olduğunu demişdim.

Mən bu gün də Lövün niyə Del Boskedən güclü olduğunu izah etməkdə çətinlik çəkərəm. Amma dəqiq bilirəm ki, almaniyalı mütəxəssis ispaniyalı həmkarından güclüdür. Zənnimcə, dörd il əvvəlkindən fərqli indi çoxu bu fikirlə razılaşar. Keçən vaxt ərzində biz Lövün taktiki gedişlər hesabına oyunun axarını komandasının xeyrinə dəyişdiyinə dəfələrlə şahidlik etmişik. Eyni zamanda Del Boskenin də komandasına təsirinin nə qədər effektli olub-olmadığını görmüşük. Artıq sular durulub. Zənnimcə, hər iki məşqçinin səviyyəsi məlumdur və Lövün güclü olduğu müzakirə mövzusu da deyil.

Mən bu gün həmin Almaniya - İspaniya oyununun keçirilmə tarixinə baxdım. 7 iyul 2010-cü il. Bizim müzakirələrsə həmin oyunun səhəri günü, ayın 8-də olmuşdu. Deməli, düz dörd il sonra - 8 iyul 2014-cü ildə, Braziliya - Almaniya oyununda biz yenidən Yöahim Lövın taktiki dühasını gördük. Bəli, əgər eyni güclü iki komanda qarşılaşanda biri digərini böyük hesabla uda bilirsə bu, baş məşqçinin gücündən xəbər verir. Məsələn, İspaniya - Hollandiya oyununda olduğu kimi...

Bəzən nəyisə teorem kimi sübut etməyə ehtiyac olmur. Qoy, bu da olsun, "Löv aksiomu”!