Bu gün Beynəlxalq Muğam Mərkəzində "İlk Avropa Oyunları qədim Bakı torpağında” adlı mahnı və klipin təqdimat mərasimi keçirilib. Sportnet.az-ın məlumatına görə, mərasimdə gənclər və idman naziri, Bakı 2015 Avropa Oyunları Əməliyyat Komitəsinin (BEGOC) baş icraçı direktoru Azad Rəhimov, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN xidmət) sədri İnam Kərimov, Gənclər Fondunun icraçı direktoru Fərhad Hacıyev və bir sıra təşkilatların rəhbər şəxsləri iştirak ediblər.
Rəhimov və Kərimov idman azarkeşlərini gözəl mahnı və maraqlı klip münasibətilə təbrik edərək, Azərbaycan incəsənət ustalarına təşəkkür edib. ASAN Xidmət könüllülərinin təşəbbüsü ilə hazırlanan klip ilk dəfə bu gün nümayiş etdirilib və mərasimə toplaşanların alqışları ilə qarşılanıb.
Tanınmış müğənnilər - əməkdar artist Sevda Ələkbərzadə və xalq artisti Samir Cəfərov Oyunların ölkəmizin tarixində ən qürurverici hadisələrdən olduğunu qeyd edərək, yarışların başlanmasını bütün xalqımızın, o cümlədən, incəsənət ustalarımızın da səbirsizliklə gözlədiklərini qeyd ediblər.
Tədbirin sonunda akapella və fləşmob təşkil olunub.
