Bu gün Azərbaycan Premyer Liqasında XIII turun daha bir oyunu keçirilib. Sportnet.az-ın məlumatına görə, günün yeganə oyununda "Zirə" "İnter"i qəbul edib.
Zirə Olimpiya Stadionunda keçirilən qarşılaşmadan öncə mərhum futbolçu Şəhriyar Xəlilov xatirəsi bir dəqiqəlik sükutla yad edilib.
Bundan sonra komandalar oyuna başlayıb. İlk hissədə komandalar qarşılıqlı hücumlarla yadda qalıb. Oyunun əvvəllərində meydan sahibləri fərqlənsə də, maçtın baş hakimi oyundan kənar vəziyyət olduğu üçün qolu qeydə almayıb. İlk hissədə komandaların fərqlənmək istəyi boşa çıxıb və hesab açılmayıb.
İkinci hissəyə isə qonaqlar daha aktiv başlayıb. Oyunun 48-ci dəqiqəsində Ruslan Abışov topu qapıya göndərib - 1:0. 66-cı dəqiqədə isə Adrian Skarlatake kobud oyuna görə ikinci sarı vərəqə alaraq meydandan qovulub. Qalan dəqiqələrdə "bankirlər" 10 nəfərlə mübarizə aparıb.
Lakin meydan sahibləri bu hesabla barışmayıb. Krneta oyuna əlavə olunmuş dəqiqələrin sonlarında hesabı bərabərləşdirib.
Oyun 1:1 hesabı ilə yekunlaşıb.
Bu görüşdən sonra "İnter" xal ehtiyatını 24-ya çatdıraraq 3-cü pillədə möhkəmlənib. "Zirə" isə 15 xalla "Kəpəz"lə 4 və 5-ci pillələri bölüşür.
Azərbaycan Premyer Liqası, XIII tur
28 noyabr
17:00. "Zirə" - "İnter" - 1:1
Qol: Yohan Krneta, 90+2 - Ruslan Abışov, 48
Qırmızı vərəqə: Adrian Skarlatae (ikinci sarı vərəqə)
Hakimlər: Orxan Məmmədov, Mübariz Haşımov, İsgəndər Əliyev, Vüsal Qənbərov
Əlavə köməkçi hakimlər: Ömər Paşayev, İnqilab Məmmədov
AFFA nümayəndəsi: Rauf Əmirov
Hakim-inspektor: Kərim Ağayev
Zirə İdman Kompleksinin stadionu
Qeyd edək ki, tura sabah keçiriləcək "Qarabağ" - "Qəbələ" oyunu ilə yekun vurulacaq.
