Futbol üzrə Çempionlar Liqasında 1/8 final mərhələsinin növbəti matçları keçirilib.
Sportnet.az xəbər verir ki, ikinci oyun günündə iki görüş təşkil olunub. Qarşılaşmalardan biri İspaniyada, digəri Portuqaliyada reallaşıb. Ardıcıl iki mövsüm turnirin qalibi olan "Real Madrid” favoritlərdən sayılan Fransa təmsilçisi PSJ-ni qəbul edib. Hesabı qonaqlar açsa da, ilk yarının sonunda Kriştianu Ronaldu bərabərlik qolunu vurub. İkinci hissədə portuqaliyalı hücumçu daha bir dəfə fərqlənərək, aktivindəki qolların sayını 11-ə çatdırıb. Matçda son nöqtəni isə Marselo qoyub - 3:1.
Bu matçda Madrid təmsilçisinin heyətində Daniel Karvahal cəza, Xesus Valyexo və Dani Sebalyos isə zədə üzündən meydana çıxa bilməyib. PSJ-də isə zədəli Tyaqo Motta və Leven Kyurzava oynamayıb.
Günün digər qarşılaşması Portuqaliyanın "Portu” və İngiltərənin "Liverpul” kollektivləri arasında olub. Ölkə çempionatının lideri olan meydan sahibləri qapısında 5 cavabsız top görüb. Qonaq komandadan Sadio Mane het-trik edib. Digər qolları Məhəmməd Salah və Roberto Firmino vurub.
"Portu”da Felipe Monteyro cəza,Andre Filipe Braş və Vensan Abubakar zədə üzündən oynamayıb. "Liverpul”da isə Emre Can cəza, Nataniel Klayn isə zədə üzündən görüşdə iştirak etməyib.
Cavab görüşləri martın 6-da keçiriləcək.
Çempionlar Liqası
1/8 final, ilk oyunlar
14 fevral
23:45. "Real Madrid" (İspaniya) - PSJ (Fransa) - 3:1
Qol: Ronaldu, 45; 82. Marselo, 86 - Adrian Rabyo, 33,
Baş hakim: Canluka Rokki (İtaliya)
23:45. "Portu" (Portuqaliya) - "Liverpul" (İngiltərə) - 0:5
Qol: Sadio Mane, 25, 53, 85. Məhəmməd Salah, 29. Roberto Firmino, 70
Baş hakim: Daniele Orsato (İtaliya)
Qeyd edək ki, ilk oyun günündə İngiltərənin digər təmsilçilərindən "Mançester Siti" İsveçrədə "Bazel"i 4:0 hesabı ilə yenib, "Tottenhem" isə İtaliyada "Yuventus"la heç-heçəyə nail olub - 2:2.
