Futbol üzrə Avropa Liqasında ikinci finalçı müəyyənləşib.
Sportnet.az-ın məlumatına görə, mayın 29-da Bakıda keçiriləcək həlledici qarşılaşmada İngiltərə "Arsenal"ına "Çelsi" rəqib olub. "Zadəganlar" yarımfinalda Almaniya "Ayntraxt"ı ilə həm səfər, həm də ev matçını 1:1 hesablı heç-heçə ilə başa vurub. Əlavə vaxtda da nəticə dəyişmədiyi üçün qalib penaltilər seriyası ilə müəyyənləşib.
Bu zaman "Çelsi"dən Sezar Aspilikueta, "Ayntraxt"dan isə Martin Hinteregger və Qonsalo Pasiensia dəqiq olmayıb. Nəticədə London komandası 4:3 hesabı ilə qələbə qazanaraq, həlledici görüşdə iştirak hüququna yiələnib.
Qeyd edək ki, Bakı Olimpiya Stadionunda təşkil olunacaq "Arsenal" - "Çelsi" qarşılaşması saat 23:00-da başlanacaq. "Arsenal" kimi "Çelsi" də bu arenada meydana çıxıb. 2017-2018 mövsümündə "zadəganlar" "Qarabağ"la Çempionlar Liqasının qrup oyununu böyük hesablı qələbə ilə başa vurub - 4:0.
--------
Futbol üzrə Avropa Liqasında ilk finalçının adı məlum olub.
Sportnet.az xəbər verir ki, İngiltərənin "Arsenal" komandası bu mövsüm ikinci dəfə Bakıya səfər edəcək. "Topçular" yarımfinalda İspaniya "Valensiya"sını üstələyib. Londondakı ilk görüşdə 3:1 hesablı qələbə qazanan Unay Emerinin baş məşqçi olduğu kollektiv səfərdə də 2 top fərqi ilə qalib gəlib - 4:2. "Arsenal"ın qollarından 3-nü Pyer Emerik Obameyanq, digərini Aleksandr Lyakazett vurub. "Valensiya"dan isə bu gün 32 yaşı tamamlanan Kevin Qameyro fərqlənib.
Mayın 29-da Bakı Olimpiya Stadionunda keçiriləcək həlledici qarşılaşmada "Arsenal"ın rəqibi hazırda davam edən "Çelsi" (İngiltərə) - "Ayntraxt" (Almaniya) görüşünün qalibi olacaq.
Qeyd edək ki, "Arsenal" bu mövsüm qrup mərhələsində "Qarabağ"la səfər matçını da Bakı Olimpiya Stadionunda keçirib. Görüş London komandasının 3:0 hesablı qələbəsi ilə yekunlaşıb.
------------------
Bu gün UEFA Avropa Liqasında finalçılar müəyyənləşəcək.
Sportnet.az-ın məlumatına görə, yarımfinal mərhələsinin cavab matçlarından sonra Bakıdakı həlledici qarşılaşmada iştirak edəcək komandalar bəlli olacaq.
"Çelsi" İngiltərədə Almaniyanın "Ayntraxt" komandasını qəbul edəcək. Səfərdəki matçda rəqibi ilə 1:1 hesablı heç-heçə etmiş londonlular, az da olsa, üstünlüyə malikdirlər.
2012/2013 mövsümündə turnirin qalibi olan meydan sahibləri bu mövsüm qrup mərhələsindən sonra İsveçin "Malmö", Ukraynanın "Dinamo" (Kiyev) və Çexiyanın "Slaviya" komandalarını mübarizədən kənarlaşdırıb. Mauritsio Sarrinin rəhbərlik etdiyi kollektiv həmçinin cari mövsüm turnirin heç bir görüşündə uduzmayıb. 1979/1980 mövsümündə turnirin kubokuna sahib olan "Ayntraxt" isə cari mövsümdə qrup mərhələsinin ardından Ukrayna "Şaxtyor"unu, İtaliya "İnter"ini və Portuqaliya "Benfika"sını üstələyib.
Digər yarımfinalda İngiltərənin turnirdəki daha bir təmsilçisi "Arsenal" İspaniyada "Velensiya"nın qonağı olacaq. Londondakı görüşdə rəqibini 3:1 hesabı ilə məğlub etmiş "topçular" üstünlüyünü qorumağa çalışacaqlar. "Arsenal" ötən mövsüm yarımfinalda İspaniya "Atletiko"suna uduzaraq finalın bir addımlığında dayanıb. "Yarasalar" isə 2003-2004 mövsümündə UEFA Kubokunun (indiki Avropa Liqası) qalibi olub. "Arsenal" qrup mərhələsindən sonra Belarus BATE-si, Fransa "Renn"i və İtaliya "Napoli"sindən güclü olub. "Valensiya" isə Şotlandiyanın "Seltik", Rusiyanın "Krasnodar" və İspaniyanın "Vilyarreal" komandalarını üstələyib.
Qeyd edək ki, Avropa Liqasının finalı mayın 29-da Bakı Olimpiya Stadionunda keçiriləcək.
Avropa Liqası
Yarımfinal, cavab oyunları
9 may
23:00. “Valensiya” (İspaniya) – “Arsenal” (İngiltərə) - 2:4
Qollar: Kevin Qameyro, 11; 58 - Pyer-Emerik Obameyanq, 17; 69; 88. Aleksandr Lyakazett, 50
Baş hakim: Danni Makkeli (Hollandiya)
Valensiya. “Mestalya” stadionu
İlk oyun - 1:3
23:00. “Çelsi” (İngiltərə) – “Ayntraxt” (Almaniya) - 1:1 (ƏLAVƏ VAXT - 0:0, penaltilərlə - 4:3)
Qollar: Ruben Loftus-Çik, 28 - Luka Yoviç, 49
Penaltilər seriyası: Sebastyan Alle (0:1), Ross Barkli (1:1), Luka Yoviç (1:2), Sezar Aspilikueta (1:2), Conatan de Quzman (1:3), Jorjinyo (2:3), Martin Hinteregger (2:3), David Luis (3:3), Qonsalo Pasiensia (3:3), Eden Azar (4:3)
Baş hakim: Ovidiu Hateqan (Rumıniya)
London. “Stemford Bric” stadionu
İlk oyun - 1:1.
