Azərbaycan Premyer Liqasında III tura yekun vurulub.
Sportnet.az-ın məlumatına görə, turun sonuncu matçında "Səbail" "Qarabağ"ı qəbul edib. "ASCO Arena"da keçirilmiş qarşılaşmada Ağdam təmsilçisi rəqibini darmadağın edib - 4:0. Hesabı 2-ci dəqiqədə Dani Kintana açıb. 29-cu dəqiqədə gənc futbolçu İsmayıl İbrahimli topu "Səbail"in qapısından keçirib. Yarımmüdafiəçi 59-cu dəqiqədə fərqlənməklə fərqi daha da artırıb. 62-ci dəqiqədə Mahir Emreli növbəti dəfə paytaxt təmsilçisini məyus edib.
Bu nəticədən sonra "Qarabağ" xallarını 9-a çatdıraraq çempionatın vahid lideri olub. "Səbail" isə 6 xalla "Keşlə" ilə birlikdə 2-3-cü yerləri bölüşdürür.
Qeyd edək ki, bu gün keçirilmiş digər matçda "Neftçi" evdə "Sumqayıt"ı üstələyib - 2:1. İlk oyun günündə "Keşlə" səfərdə "Qəbələ"yə böyük hesabla qalib gəlib - 4:0. "Zirə" - "Sabah" dueli isə heç-heçə ilə yekunlaşıb - 1:1.
----------------------------------
Azərbaycan Liqasında III turun. daha bir oyunu keçirilib.
Sportnet.az-ın məlumatına görə, Bakcell Arena"da "Neftçi" "Sumqayıt"ı qəbul edib. Görüş meydan sahiblərinin 2:1 hesablı qələbəsi ilə yekunlaşıb. Hesabı 33-cü dəqiqə "Sumqayıt"ın yeni transferi Mehdi Şərifi açıb. O, qapıçı Səlahət Ağayevin kobud oyunundan sonra təyin olunmuş penaltini dəqiq yerinə yetirib. Şərifi bununla da qollarının sayını 3-ə çatdıraraq, bombardir olub.
"Neftçi" bu qola 64-cü dəqiqədə kapitan Emin Mahmudovun dəqiq zərbəsi ilə cavab verib.
83-cü dəqiqədə Murad Xaçayev ikinci sarı vərəqə alaraq, qonaqları azlıqda qoyub. Meydan sahibləri say üstünlüyündən uzatma dəqiqələrində Stiven Jozef-Monrozun dəqiq zərbəsi ilə yararlana bilib. Bu qoldan sonra meydanda iki komandanın üzvləri arasında toqquşma baş verib. Nəticədə "Neftçi"nin məşqçisi Etibar Tanrıverdiyev "Sumqayıt"ın baş məşqçisi Ayxan Abbasovu vurub. Eyni zamanda müdafiəçilər Anton Krivotsyukla Vurğun Hüseynov mübahisə edib. Referi hər iki oyunçunu meydandan qovub.
Bununla da ilk qələbəsini qazanan "Neftçi" xallarını 4-ə çatdırıb və 5-ci pilləyə yüksəlib. 3 xalı olan "Sumqayıt" isə 6-cı pilləyə enib.
--------
Bu gün keçiriləcək daha iki oyunla Azərbaycan Premyer Liqasının III turuna yekun vurulacaq.
Sportnet.az-ın məlumatına görə, əvvəlcə "Neftçi" "Bakcell Arena"da "Sumqayıt"ı sınağa çəkəcək. Hazırda flaqman 1 xalla 7-ci, "gənclik şəhəri" təmsilçisi 3 xalla 5-ci pillədə qərarlaşıb. Meydan sahibləri qalib gəlsələr, 5-ci, qonaqlar qələbə qazansalar, ən azı 4-cü pilləyə yüksələcəklər.
Bu, iki komanda arasında 29-cu qarşılaşma olacaq. Əvvəlki görüşlərin 14-dən "Neftçi", 10-dan "Sumqayıt" qalib ayrılıb, 4 oyun isə heç-heçə ilə yekunlaşıb. Paytaxt komandası topların nisbətində də öndədir - 45:34. Son 5 görüşdə meydan sahibi klub qalib gələ bilməyib. Bu il keçirilən matçlarda hər iki komanda qol vurub.
Turun son oyununda isə "ASCO Arena"da "Səbail" və "Qarabağ" komandaları üz-üzə gələcək. Hazırda bu klublar hərəyə 6 xal toplayıblar və "Keşlə" ilə birgə ilk 3 yeri bölüşürlər. Amma istənilən hesablı nəticə şərikli liderlərin sayının azalmasına səbəb olacaq.
İndiyədək keçirilmiş 8 oyunun yalnız birində "Səbail" qələbə qazanıb ki, bu da texniki nəticə kimi tarixə düşüb. Qalan matçlardan isə "Qarabağ" qələbə ilə ayrılıb. Başqa sözlə, hələ komandalar heç-heçə etməyiblər. “Səbail” öz meydanında keçirdiyi bütün oyunlarda uduzub. Topların nisbətində isə Ağdam komandası öndədir - 13:1.
Azərbaycan Premyer Liqası, III tur
1 sentyabr (bazar)
19:00. “Neftçi” – “Sumqayıt” - 2:1
Qollar: Emin Mahmudov, 64. Stiven Jozef Monroz, 90+4 - Mehdi Şərifi, 33 (penalti ilə)
Qırmızı vərəqələr: Anton Krivotsyuk, 90+4. - Murad Xaçayev, 83. Vurğun Hüseynov, 90+4
Hakimlər: Səbuhi Bayramov, Müslüm Əliyev, Eyyub İbrahimov, Elçin Məsiyev
Hakim-inspektor: Feyzulla Feyzullayev
AFFA nümayəndəsi: İlham Əliyev
“Bakcell Arena”
21:00. “Səbail” – “Qarabağ” - 0:4
Qollar: Dani Kintana, 2. İsmayıl İbrahimli, 29. 59. Mahir Emreli, 62
Hakimlər: Kamal Umudlu, Pərvin Talıbov, Cavanşir Yusifov, Rəhim Həsənov
Hakim-inspektor: Kərim Ağayev
AFFA nümayəndəsi: Rüfət Əmirov
“ASCO Arena”
Qeyd edək ki, ilk oyun günündə "Keşlə" səfərdə "Qəbələ"yə böyük hesabla qalib gəlib - 4:0. "Zirə" - "Sabah" matçı isə heç-heçə ilə yekunlaşıb - 1:1.
