Azərbaycan Premyer Liqasında XXVII tura yekun vurulub.
Sportnet.az-ın məlumatına görə, eyni saatda start götürən son 3 matçın ikisində meydan sahibləri, birində qonaqlar qələbə qazanıblar.
Lider "Qarabağ" "Azərsun Arena"da "Keşlə"ni 2 cavabsız qolla məğlub edib. Qolları 47-ci dəqiqədə Mahir Emreli, 74-cü dəqiqədə Kvabena Ovusu vurublar. 80-ci dəqiqədə Emreli penaltidən yararlana bilməyib.
İkinci pillədə qərarlaşan "Neftçi" Sumqayıtda eyniadlı komandaya minimal hesabla qalib gəlib. Yeganə qola ilk hissənin əsas vaxtına əlavə olunmuş 1-ci dəqiqədə Voyislav Stankoviç imza atıb.
"Zirə" isə evdə "Səbail" üzərində 2:0 hesablı qələbə qazanıb. 58-ci dəqiqədə Ağabala Ramazanov komandasını önə çıxarıb. 6 dəqiqə sonra isə Nemanya Ancelkoviç 2-ci topu rəqibin qapısından keçirib.
Bu nəticələrdən sonra "Qarabağ" (57 xal) və "Neftçi" (56 xal) mövqelərində qalıb. "Zirə" 38 xalla 3-cü pilləyə yüksəlib. 36 xalı olan "Sumqayıt" isə 4-cü sıraya geriləyib. Beləliklə, çempion, vitse-çempion və bürünc medalçı son turda məlum olacaq. Axırıncı turda "Neftçi" - "Qarabağ", "Sabah" - "Zirə", "Səbail" - "Sumqayıt" və "Keşlə" - "Qəbələ" matçları keçiriləcək. Bütün oyunlar mayın 19-da olacaq.
Qeyd edək ki, günün ilk oyununda "Qəbələ" evdə "Sabah"la məhsuldar heç-heçə edib - 2:2.
-----------------------------------
Futbol üzrə Azərbaycan Premyer Liqasında XXVII tura start verilib.
Sportnet.az-ın məlumatına görə, günün ilk oyununda "Qəbələ" və "Sabah" komandaları üz-üzə gəlib. Qəbələ şəhər stadionunda keçirilən görüş 2:2 hesabı ilə başa çatıb.
Qonaqlar oyuna bir çox itki ilə çıxıb. Filip İvanoviç cəza, Amadu Diallo, Kevin Kubemba və Fofana Tiemoko isə zədə səbəbindən əyalətdəki matçda iştirak etməyib.
Qarşılaşmada hesab 28-ci dəqiqədə açılıb. Bakı klubunun heyətində Xolio Sezar Rodriges fərqlənib. İlk hissədə qapılara başqa qol vurulmayıb. İkinci yarıya da fəal başlayan "Sabah" komandası 59-cu dəqiqədə fərqi 2 topa çatdırıb. Bu dəfə Slavik Alxasov adını tabloya yazdırıb. Lakin Masazır təmsilçisi üstünlüyünü qoruyub saxlaya bilməyib. 63-cü dəqiqədə "Qəbələ"nin hücumçusu Nikolas Raysel buraxılan toplardan birinin əvəzini çıxıb. Cəmi 2 dəqiqə sonra Stefan Vukçeviç hesabı bərabərləşdirərək yekun nəticəni müəyyənləşidirib.
Bu heç-heçədən sonra xallarını 26-ya çatdıran "Sabah" və "Qəbələ" müvafiq olaraq, 5 və 6-cı pillələri bölüşdürür.
Qeyd edək ki, turun bu gün keçiriləcək digər 3 oyununda "Sumqayıt" "Neftçi"ni, "Qarabağ" "Keşlə"ni və "Zirə" "Səbail"i qəbul edəcək.
------------------------------------------------
Bu gün futbol üzrə Azərbaycan Premyer Liqasında XXVII turun oyunları keçiriləcək. Sportnet.az-ın məlumatına görə, matçlardan 3-ü eyni saatda başlayacaq.
Günün ilk matçında isə "Qəbələ" "Sabah"ı qəbul edəcək. 25 xala malik komandalar 5-6-cı yerləri bölüşdürür. Sadəcə, "Sabah" ikili oyunlarda daha üstündür."Qəbələ" turnir cədvəlində irəlimək üçün mütləq qalib gəlməlidir.
İki komanda Premyer Liqada 10 dəfə üz-üzə gəlib. Bunların 4-də əyalət təmsilçisi, 5-də isə paytaxt klubu qələbə qazanıb. Topların nisbətində də "Sabah"ın üstünlüyü var - 12:10. Qonaqlar rəqibinə qarşı 5 oyundur meydanı qolsuz tərk etmir. Qəbələdəki son iki görüşdə 3 qol qeydə alınıb.
Çempionluğa iddialı komandalardan "Neftçi" "Sumqayıt"ın qonağı olacaq. "Ağ-qaralar" 53 xala malik lider "Qarabağ"dan bir xal geridədir. "Gənclik şəhəri" təmsilçisi 36 xalla üçüncüdür.
Çempionatdakı 34 oyundan 16-da flaqman, 14-də meydan sahibləri meydanı 3 xalla tərk edib. Topların nisbətində də "Neftçi" üstündür - 42:52. Qonaqlar Premyer Liqadakı son 4 oyunda qələbə qazana bilmir. “Sumqayıt” öz meydanındakı son 4 matçdan qalib ayrılmayıb. Hazırda 54 lider olan son ölkə çempionu "Qarabağ" 23 xalla sonuncu - 8-ci pillədə gedən "Keşlə"ni qəbul edəcək. Bu, komandaların Premyer Liqada 66-cı dueli olacaq. Əvvəlki 65 qarşılaşmanın 30-da Ağdam klubu, 13-də paytaxt təmsilçisi qələbə qazanıb. Topların nisbətində də "köhlən atlar"ın aşkar üstünlüyü var - 83:42. “Qarabağ” son 10 oyunda rəqibinə uduzmayıb. Ağdamlıların son 4 ev matçında 3 və ya daha çox qol vurulub.
Günün digər görüşündə "Zirə" "Səbail"i qəbul edəcək. Meydan sahibləri 35 xalla 4-cü, "dənizçilər" isə 24 xalla 7-ci sıradadır. Çempionatda 14 oyunun 7-də "qartallar", 3-də isə qonaqlar 3 xal qazanıb. Topların nisbətində "Zirə" üstündür - 17:8. Komandalar arasında son iki Premyer Liqa matçında qol vurulmayıb. “Səbail” 5 oyundur rəqibinə qalib gələ bilmir.
Azərbaycan Premyer Liqası, XXVII tur
14 may (cümə)
17:00. “Qəbələ” –“Sabah” - 2:2
Qollar: Nikolas Raysel, 63, Stefan Vukçeviç,65 - Xulio Sezar Rodriges, 28, Slavik Alxasov, 59
Hakimlər: Elçin Məsiyev, Elşad Abdullayev, Pərvin Talıbov, Rəşad Əhmədov
Hakim-inspektor: Rövşən Əhmədov
AFFA nümayəndəsi: Bəhram Qurbanov
Qəbələ şəhər stadionu
19:00. “Zirə” – “Səbail” - 2:0
Qollar: Ağabala Ramazanov, 58, Nemanya Ancelkoviç, 64
Hakimlər: İnqilab Məmmədov, Akif Əmirəli, Nahid Əliyev, Namiq Bəkirov
Hakim-inspektor: Gülağa Cabarov
AFFA nümayəndəsi: Erkin Hüseynov
Zirə İdman Kompleksinin stadionu
19:00. “Qarabağ” – “Keşlə” - 2:0
Qol: Mahir Emreli, 47. Ovusu Kvabena, 74
Qeyri-dəqiq penalti: "Mahir Emreli, 80 (Qarabağ)
Hakimlər: Kamal Umudlu, Müslüm Əliyev, Eyyub İbrahimov, Əliyar Ağayev
Hakim-inspektor: Anar Salmanov
AFFA nümayəndəsi: Kərim Ağayev
“Azersun Arena”
19:00. “Sumqayıt” – “Neftçi” - 0:1
Qol: Voislav Stankoviç, 45+1
Hakimlər: Rauf Cabarov, Namiq Hüseynov, Cavanşir Yusifov, Rəvan Həmzəzadə
Hakim-inspektor: Feyzulla Feyzullayev
AFFA nümayəndəsi: Aslan Şahgəldiyev
“Kapital Bank Arena”.
