Azərbaycan millisin heyətinə yeni futbolçu cəlb olunacaq. Sportnet.az-ın məlumatına görə, FİFA Ukraynanın "Metallurq” (Zaporojye) klubunun əslən azərbaycanlı olan müdafiəçisi Pavel Paşayevin yığmamızda çıxışına razılıq verib.
Bu barədə AFFA-nın rəsmi saytı xəbər yayıb. Federasiya onun müvafiq qaydalara uyğun olaraq Azərbaycan millisində çıxış etməsinə razılıq vermək üçün FIFA-ya müraciət ünvanlayıb. FIFA-nın Oyunçuların Statusu Komitəsinin AFFA-ya ünvanladığı məktubda bildirilib ki, assosiasiyanı dəyişməklə bağlı AFFA və Pavel Paşayevin FIFA-ya müraciəti təmin olunsun və futbolçu qərarı aldığı tarixdən etibarən Azərbaycan milli komandasında oynamaq hüququna sahibdir.
Qeyd edək ki, Pavel Paşayev AFFA-ya müraciət edərək Azərbaycan millisində oynamaq istədiyini qeyd etmişdi. Ukrayna Futbol Federasiyası isə AFFA-ya futbolçunun bu ölkənin aşağı yaş qruplarından ibarət yığmalarında çıxış etsə də, əsas komandada oynamadağını bildirib.
