Azərbaycan Premyer Liqasında VI tura start verilib.
Sportnet.az xəbər verir ki, həftənin açılış oyununda "Qarabağ" "Sumqayıt"ı qəbul edib. Tofiq Bəhramov adına Respublika stadionunda baş tutan matçın ilk yarısı meydan sahiblərinin minimal üstünlüyü ilə yekunlaşıb. Ağdam təmsilçisinin heyətində 45+2-ci dəqiqədə Dani Kintana fərqlənib. Qarşılaşmada son nöqtəni isə 90-cı dəqiqədə Mahir Emreli qoyub - 2:0.
Beləliklə, ardıcıl 6-cı qələbəsini qazanan "Qarabağ" xalını 18-ə çatdırıb və 100 faizlik nəticə ilə vaxtından əvvəl ilk dövrənin qalibi olub. "Sumqayıt" isə 6 xalla 5-ci yerdədir.
Qeyd edək ki, turun qalan 3 oyunu həftəsonu keçiriləcək. Şənbə günü "Qəbələ" "Neftçi"ni qəbul qəbul edəcək. Ertəsi gün isə "Sabah" - "Səbail" və "Keşlə" - "Zirə" matçları olacaq.
------------------------------------------------------
Bu gün futbol üzrə Azərbaycan Premyer Liqasında VI tura start veriləcək.
Sportnet.az-ın məlumatına görə, ilk oyun günündə bir qarşılaşma keçiriləcək. Son ölkə çempionu "Qarabağ" Tofiq Bəhramov adına Respublika Stadionunda "Sumqayıt"la üz-üzə gələcək. Qarşılaşmanı Elçin Məsiyevin başçılıq etdiyi hakimlər briqadası idarə edəcək.
Ağdam təmsilçisi 5 turdan sonra bütün oyunlarda qələbə qazanıb və 15 xalla turnir cədvəlinə başçılıq edir. "Sumqayıt" isə 6 xalla beşinci pillədə qərarlaşıb.
Komandalar indiyədək Premyer Liqada 28 dəfə üz-üzə gəliblər. Bunların 21-də meydan sahibləri, 4-də isə "gənclik şəhəri" təmsilçisi meydanı 3 xalla tərk edib. Üç qarşılaşma isə heç-heçə yekunlaşıb. Topların fərqində də "Qarabağ"ın aşkar üstünlüyü var - 61:12. "Köhlən atlar" rəqibinə qarşı son 5 çempionat matçında quru hesabla qələbə qazanıb. "Sumqayıt" isə ardıcıl 15 oyunda qalib gələ bilməyib.
Azərbaycan Premyer Liqası, VI tur
27 sentyabr (cümə)
19:00. “Qarabağ” – “Sumqayıt” - 2:0
Qollar: Dani Kintana, 45+2. Mahir Emreli, 90
Hakimlər: Elçin Məsiyev, Elşad Abdullayev, Qəzənfər Məmmədov, Rauf Allahverdiyev
Hakim-inspektor: Anar Salmanov
AFFA nümayəndəsi: Rüfət Əmirov
Tofiq Bəhramov adına Respublika Stadionu
Qeyd edək ki, VI turun digər oyunu sabah keçiriləcək. "Qəbələ" "Neftçi"ni qəbul edəcək. Tura sentyabrın 29-da "Sabah" - "Səbail" və "Keşlə" - "Zirə" qarşılaşması ilə yekun vurulacaq.
