"Bakı 2015" I Avropa Oyunlarının Tofiq Bəhramov adına Respublika Stadionunda bu gün yeni bilet satış məntəqəsi açılıb. Sportnet.az-ın məlumatına görə, bu qərar son həftələrdə biletlərə tələbatın xeyli artması ilə əlaqədar verilib.
Stadionun çölündəki yeni bilet satış məntəqəsi Bakıda açılan 12-ci belə mərkəzdir. Məntəqə hər gün saat 11:00-dan 21:00-a qədər fəaliyyət göstərəcək. Digər bilet satış məntəqələri "Park Bulvar", "28 Mall" və "Metro Park" alış-veriş mərkəzləri də daxil olmaqla Bakının əlverişli məkanlarında quraşdırılıb.
Ümumiyyətlə, bilet satış məntəqələrinin yerlərindən tutmuş arenalara gediş-gəliş haqqında ətraflı məlumat da daxil olmaqla, Avropa Oyunları ilə əlaqədar istənilən məsələ haqqında informasiyanı 2015 nömrəsinə zəng edərək, Tamaşaçı Məlumat Mərkəzindən yaxud "Bakı 2015" veb-səhifəsindən əldə etmək olar.
