"Zəif"in gücü və ya "ulduz"un itməkliyi

"Neftçi” və "İnter” eyni gündə oyuna çıxdı. "Neftçi” evdə, "İnter” səfərdə. "Neftçi” çempionatının səviyyəsi Azərbaycan Premyer Liqasınınkından zəif olan rəqiblə, "İnter” isə yüksək liqasının səviyyəsi Azərbaycan çempionatının səviyyəsindən güclü olan rəqiblə qarşılaşdı. Məntiqlə "Neftçi” "Koper”i udmalı, "İnter” "Elfsborq”a uduzmalı idi. Amma əksi baş verdi: "Neftçi” uduzdu, "İnter” uddu.

Deməli, burada bizim nəzərimizdən qaçan nüanslar var. Gəlin, apaşdıraq görək bunlar hansı nüanslardır?

Heyət? Xeyr, demək olar ki, hər iki komandamızın heyəti eyni gücdə idi, hətta "Neftçi”nin heyəti "İnter”dən güclüdür. Məsələn, "İnter”də Flavinyo, Vobay səviyyəsində ustalar yoxdur, eləcə də Araz səviyyəsində yerli.

Bəs hansı amil qaldı?

Məşqçi amili? Bəli, mən qətiyyətlə deyirəm ki, dünən "Neftçi”nin sükanı arxasında Tsxadadze olsaydı, bu komanda rəqibinə azı üç top vurardı. "İnter” səfərdə güclü rəqibinə məhz Tsxadadzenin hesabına qalib gəldi, onun seçdiyi heyətin, qurduğu taktikanın, futbolçulara verdiyi psixoloji kökləmənin (dəstəyin), komandada yaratdığı əhval ruhiyyənin hesabına yendi. Bunları bir komandada etmək üçün məşqçiyə təkcə futbol biliyi kifayət etməz. Bunun üçün məşqçidə savad, yaradıcılıq, ədalət hissi, insanlıq, bir sözlə - yüksək intellektual səviyyə olmalıdır.

Bəs bu dediyimiz intellektual səviyyə "Neftçi”nin baş məşqçisi Böyükağa Hacıyevdə varmı? Əslində Hacıyevin bir cümləsinə qulaq asmaq kifayətdir ki, bu suala cavab tapasan. Lakin gəlin, yenə də araşdıraq. Elə dünən onun mətbuat konfransında həmkarımız Rəşad Ergünə qarşı rəftarına baxaq. Hacıyev ayıbına kor olmaq əvəzinə jurnalistə hücum çəkir, üstəlik oğlunu da bu işə qoşur. Bu qəbilə, tayfa düşüncəsidir, dava salmaq, kiməsə xox gələrək qorxutmaq.

Bəli, onun bacardığı budur. Amma futbolda qalib gəlmək üçün bu qaydalar, şərtlər oynanılmır. Futbolun qaydaları başqadır. Futbolda qalib gəlmək üçün komandanın baş məşqçisi mənəvi cəhətdən çox yüksək inkişaf etmiş şəxs olmalıdır. Yəni, şəxsiyyət olmalıdır. Artıq XXI əsrdir. Belə təfəkkürlü insanın ölkənin aparıcı komandasına rəhbərlik etməsi, yumşaq ifadə etsək, ayıbdır. Bəlkə də Azərbaycanda bu cür psixologiya ilə nəyəsə nail olarsınız, amma beynəlxalq arenaya çıxan kimi bilin, "burnunuzun üstündən” vurub geri oturdacaqlar. Necə ki, bunu dünən etdilər.

"Neftçi” bəlkə də bu oyunda cavab və hətta qələbə topunu vura bilərdi. Lakin Böyükağa Hacıyevin etdiyi "dahiyanə” əvəzetmələr bunun qarşısını aldı.

"Buraxdığımız iki qol təmiz hədiyyə idi”. Bunu Hacıyev mətbuat konfransına başlayanda deyib. "Mən həmin Böyükağa Hacıyevəm ki, APOEL-ə səfərdə "üç dənə” vurdum”. Bu cümləni isə o konfransın sonunda deyib. Fikir verın, qol buraxanda "biz buraxdıq” olur, vuranda "mən Böyükağa Hacıyev vurdum”. Adətən məşqçilərə həmişə əksi aid edilir. Yəni, udanda komanda udur, uduzanda məşqçi. Amma "Zəif”in sözlərindən göründüyü kimi, o, çox "təvazökar”dır.

Düzdür, şəxsən mən təvəzökarlığın əleyhinəyəm, amma bu qədər lovğalığı da qəbul edə bilmirəm. Adama deyərlər, sən hardan APOEL-ə üç qol vurdun? Əvvəla qolu futbolçular vurublar, sonrası da səndən başqa bu qələbədə nə qədər əməyi keçən insanlar var. Onlar bir qoz?

Xatırlayıram ki, komandanı həmin vaxt Tərlan Əhmədov hazırlamışdı, çünki Hacıyev ağır əməliyyat keçirmişdi və oyuna az zaman qalmış gəlib çıxdı. Aydındır ki, müalicədən yeni qayıdan adam komandada dərhal əlahiddə bir şey edə bilməz. İndi Əhmədov yoxdur, heyət isə demək olar ki, həmin heyətdir. Bu meydan, bu şeytan. Buyur, vur "üç dənə”.

* * *

Bu arada Tahir Süleymanovun istefasını başa düşmək olmur. Əvvəla, oyun hələ tam bitməyib. Bunun cavab matçı da var. Sonrası da ki, komandanın nəticəsinə cavabdeh şəxs, baş məşqçidir. İstefaya qalsa, o verməlidir. Lakin indiki halda hər hansı istənilən rəhbərin istefası komandaya psixoloji cəhətdən mənfi təsir göstərər. "Neftçi”nin dünənki oyununa əsasən demək olar ki, komandamız səfərdə iki top vura bilər, yəni mərhələ keçə biləcək gücdədir. Sadəcə, kollektivi bir yerə toparlayıb qarşıdakı oyuna kökləmək lazımdır. Bunu isə edə biləcək şəxslərdən biri Tahir Süleymanov idi. O da istefa verdi. Amma gəlin, ümid edək. Çünki "Neftçi”nin futbolçularının səviyyəsi rəqibindən qat-qat üstündür. Bu oyunçularla orta səviyyəli bir məşqçi "Koper”i rahatlıqla keçə bilər. O da özünü dahi sayan Hacıyev ola...

RAQİB